ЯҢАЛЫКЛАР

Татар матбугаты өчен 100 ел вакыт күпме, әллә азмы? 3 май көнне Г.Тукай исемендәге Татар дәүләт филармониясендә узган бәйрәмебезгә килүчеләр әнә шул сорауга җавап табарга тырышты. “Ватаным Татарстан” укучылары, хезмәткәрләре һәм зур кунаклар белән олуг юбилеен билгеләп үтте. Бәйрәмгә килүче һәркем изге эштә дә катнаша алды. Юбилей кичәбезне хәйрия концерты итеп оештыру нияте турында алдан ук хәбәр иткән идек инде.

Бүгенге кебек дөнья куабыз дип кабаланып яшәгән, кулдан кесә телефоны-гаджетлар төш­мә­гән заманда да газетаның тот­кан урыны, үз абруе бар. Бәй­рәм­дә катнашучылар моңа та­гын бер кат инанды. Заманасы шундый дигәннән, техник яңа­лык­лар кичәбезгә дә үтеп кергән иде. Татарстан Президенты Рөс­тәм Миңнеханов, Татарстан Дәү­ләт Киңәшчесе Минтимер Шәй­миев, Татарстан Дәүләт Советы Рәисе Фәрит Мөхәммәтшин кот­лау сүзләрен сәхнә түрендәге зур экран аша җиткерде. “Рес­публика җитәкчелегендә күп ел­лар эшләү дәверендә без сез­нең белән һәрчак эшлекле һәм та­ләпчән мөнәсәбәттә булдык. Һәр көнне иртән матбугат укуны та­тарча газета-журналлардан баш­­лыйм. Алар арасында иң беренчесе – “Ватаным Татар­стан” газетасы. Аның эчтәлеге белән танышам. Бу инде – минем яшь чаклардан ук гадәтемә кер­гән гамәл. Бүген дә, фикер­дәшләр булып, сезнең белән гел янәшә атлыйбыз. Үзара теләк­тәшлек өчен бик зур рәхмәт. Алга таба бердәм булып хез­мәт итәргә язсын”, – диде Татар­станның беренче Президенты. Аның сүз­ләре йөрәккә бал-май булып ятты, билгеле. Россиянең атказанган, Татарстанның халык артисты Айдар Фәйзрахманов җитәкчеле­ген­дәге Татарстан Республикасы Фольк­лор музыкасы дәүләт ансам­б­ленең кичәне ачып җибәргән чыгышы, Татар­стан­ның халык артистлары Рөс­тәм Закиров, Зөһрә Сә­хәбиева, Резеда Галимова, Татар­станның атказанган артисты Рөс­тәм Асаев, Алсу Һәм Азат Фазлыевлар, Сиринә Зәйнетдинова, Рәшит Ваһапов фестивале лауреатлары Гөлсирин Абдуллина, Ранис Габбазов, Айсылу Габдинова һәм Азат Абитовның җырлавы  исә тагын да дәрт өстәде.

“Ничек инде, мин дә килмә­сәм, бу бәйрәмдә кайсы район башлыгы катнашырга тиеш соң? – диде театр бинасына килеп ке­рүгә Актаныш районы җитәкчесе Энгель Фәтта­хов. – Элек районда “Игенче даны” газетасы чыга иде, хәзер – “Актаныш таңнары”. Элек “Социалистик Татарстан” чыга иде, хәзер – “Ватаным Татарстан” газетасы. Төп ике басма инде ул, аларны кечкенәдән укыдык. Әти укытучы иде, ул бервакытта да шушы ике газетаны алмыйча калмады. Без “Социалистик Татарстан”, “Ватаным Татарстан” газетасын укып, шуның нәтиҗәсендә тәрбияләнеп үстек. Ул безнең рәсми орган да булып тора. Шуңа күрә ничә ел район башлыгы булып эшләгәндә дә, Казанга килгәч тә, без ул газетадан башка яшәмәдек. Министр вазифасын башкарганда да гел бергә булдык. Шуңа күрә хөрмәтем бик зур. Язгы кыр эшләре чоры булса да, бөтен эшемне ташлап килдем”. “Мин шәхсән котлап китмичә булдыра алмадым, – ди Биектау районы башлыгы Рөстәм Кәлимуллин. – 1992 елдан бирле район башлыгы булып эшлим, шу­ңа күрә газета белән тыгыз элемтәдә торабыз. “Ватаным Татарстан”да район яңалыкларын да гел яктыртып торалар. Ул – безнең үзәк басма. Мин бик канәгать”.

Тормышта басма матбугат­ның тоткан урыны, аның әһә­мияте турында Татарстан Дәүләт Советы Рәисе урынбасары, Татарстан Журналистлар берлеге җитәкчесе Римма Ратниковадан да яхшырак белүче юктыр, мөгаен. “Татарча газеталар чыга башлаганнан бирле, алар алдына куелган максатлар барыбызга да билгеле. Басма матбугат агитатор, пропаганда алып баручы һәм оештыручы вазифасын башкарырга тиеш булган. Оештыручы вазифасын, милләтне үз тирәсенә җыю бурычын “Ватаным Татарстан” газетасы бүген дә бик матур итеп башкара. Ул – чыннан да, халыкчан газета. Ре­дакциягә бик күп хатлар килә. Хат ташучы газета­ның берәр санын китереп җиткер­мәсә дә, шунда ук зар белдерәләр. Рәхмәт хатлары да күп килә. Мондый хәл бөтен редакцияләрдә дә юк. Хәзер әлеге традиция юкка чыга башлады. Ә “Ватаным Татарстан”­га халык  бик ышана. “Каян белдегез соң бу хакта?” – дип сорагач: “Ватаным Татарстан”да язылган иде”, – дип җавап биргән­нәрен үзем дә ишеткәнем бар. Әлеге басма канун дәрәҗәсендә кабул ителә. “Ватаным Татарс­тан”­да үткен каләмле, сәләтле журналистлар эшли. Газета нәкъ шундый булырга тиеш. Кыю, халык мәнфәгатьләрен яклаучы басма ул. Соңгы вакытта бүгенге кебек интернет заманында газеталар калмаячак, дигән фикер­ләр дә ишетергә туры килә. Минемчә, алай түгел ул. Халык тормышын тирән­тен аңлаучы, аларның мәнфәгать­ләрен яклаучы газета мәңге яшәя­чәк”, – дип бәяләде эшебезне Римма Ратникова.

Без “Татмедиа” республика мат­бугат һәм массакүләм ком­муникацияләр агентлыгы белән дә бер казанда кайныйбыз. “Йөз ел дәверендә газета төрле исемнәр астында басылып чыкса да, ул үзенең рухын, эчтәлеген саклап килә. Татар халкына һаман да фидакарь хезмәт итә. Бүген “Ватаным Татарстан” газетасы – рәсми матбугат органы да, социаль әһәмияткә ия булган көн кадагында торган актуаль темаларны һәм сорауларны яктыртучы басма да булып тора”, – диде агентлык җитәкчесенең беренче урынбасары Эльвира Әхмә­това. Бу исә безнең дөрес юлдан баруыбызны дәлилли. Йөз еллык бәйрәм дә – укучыларыбыз белән уртак тырышлык нәтиҗәсе! “Бер журналист йөз инспекторны алмаштыра”, – ди әнә бәйрәмдә катнашкан “Юл хәрәкәте иминлеге” оешмасы җитәкчесе Рифкат Миң­неханов.

 Бәйрәм теләкләрсез дә булмый. “Мин бәләкәйдән үк диярлек, дүрт яшьтән “Ватаным Та­тарстан”ны, ул вакытта “Совет Татарстаны”н укып үстем. Газета өйгә гел килеп торды. Без гаи­ләдә сигез бала идек, әткәй колхоз рәисе булып эшләде. Кич белән эштән арып кайткач, әткәй мине кычкырып газета укыта иде. Сигез баланың өлкәнрәк­ләре мәк­тәптә укыгач, мин дә шуларга ка­рый-карый укырга өй­рәндем. Әт­кәйгә иҗекләп “Совет Татарстаны” газетасын укый идем. Минем өчен ул – акылга, аңга, фикергә юнәлеш бирүче генә түгел, хәтта хәреф танырга өйрәтүче газета да. Билгеле, “Ватаным Татарстан” газетасының вазифасы бик тә катлаулы. Чөн­ки ул – рәсми газета. Парламенттагы бик тә җитди мәсьәләләрне халыкка җиткерү өчен, аеруча оста журналист булу кирәк. Газета – ике арадагы күпер. Бу күпер нык булсын өчен, журналистлар да, безнең җитәкчеләребез дә бик оста, сә­ләт­ле булырга тиеш. Газетаның алдагы язмышы турында уйлыйбыз икән, һичшик­сез, ул үзенең укучылары, татар халкы, Татарстанда гына түгел, республикадан читтәге мил­ләт­тәш­ләребез белән дә ныклы элемтә булырга тиеш. Ә аның өчен хөкүмәт, дәүләт тарафыннан ярдәм кирәк. Чөнки бу – мил­ләтебезнең бердәнбер басмасы, төп рәсми газетасы. Без бер максат, бер хыял тирәсендә тупланырга телибез икән, татарның бөтен төбәкләренә барып җитәргә кирәк. Бу – дәүләт дәрәҗәсендә хәл ителергә тиешле проблема”, – ди Татарстан Дәүләт Советының мәгариф, мәдәният, фән һәм милли мәсьәләләр комитеты рәисе Разил Вәлиев.

Кичәдә матур теләкләр күп әй­телде, хезмәттәшләребезгә дәү­ләт бүләкләре тапшырылды. Тарих чыл­бырын югалтмаска ярдәм итеп яшәүче ветераннарыбыз да онытылмады. Аларга чәчәк бәйләмнә­рен КФУда белем алучы булачак журналистлар тапшырды. Монысы да аерым мәгънәгә ия.

Уртак бәйрәмебездә җыелган матди ярдәм юл фаҗигасендә зыян күргән егет – Биектау райо­нының Дөбъяз авылында яшәүче Илнар Хәлиуллинга тапшырылачак. Илнар үзе бәйрәмгә килә алмады. Кичәдә аның әтисе Илги­зәр абый катнашты. “Бәлагә тарыгач та, шө­кер, тирә-юнебездә миһербанлы кешеләр күп булуына инандык. Илнарга чит ил хастаханәсендә операция ясауга 9 миллион сум акча кирәк. Без­нең гаилә өчен бик зур сумма бу. Игелекле кешеләргә, “Ватаным Татарстан” газетасы хезмәт­кәр­лә­ренә ярдәм итүләре өчен бик зур рәхмәт”, – диде Илгизәр абый. Сүз уңаеннан, бәйрәм көнне оештырылган хәйрия концерты – газетабыз үткәргән тугызынчы ярдәм чарасы. Моннан тыш, “Ватаным Татарстан”да авыр хәлдә калган кешеләр турында язмалар даими рәвештә басылып тора. Хәйрия эшендә даими катнашучыларыбыз да бар. Концертка дип, билет сатып алып, Биектаудан килгән Таһир Хәлиуллин да шундыйлардан. Концерттан соң халык таралышканда, ике хатын-кызның сөйлә­шүе дә игътибарны җәлеп итте: “Кичә буе елап утырдым. Хәйрия концертына тагын киләм әле”, – диде аларның берсе. Эшебез газета чыгару белән генә бетми.

Бәйрәмгә безне якын итеп Татарстан Сәламәтлек саклау, Экология һәм табигый ресурслар, Авыл хуҗалыгы һәм азык-төлек министрлыклары, республика­ның Азнакай, Саба, Кайбыч, Буа, Мамадыш һәм Балтач районнары хакимият­ләре, Татарстан буенча ЮХИДИ идарәсе, Татарстан Үзәк сайлау комиссиясе, Татарстан китап нәш­рия­ты, “Идел-Пресс”, Бөтен­дөнья татар конгрессы, “Таттелеком” оешмасы вәкилләре, республикадагы төр­ле матбугат чараларында эшләү­че хез­мәттәшләребез дә килде. Алар безгә җылы, ихлас теләк­ләрен җиткерде. Россия ислам институты ректоры Рә­фыйк Мө­хәммәт­шин, галим Дамир Исхаков та безнең белән бергә бәйрәм итте. Татарстан Президенты каршындагы Дәүләт Торак фонды социаль ипотека программасы буенча чиратта торучы өч хезмәттә­шебезгә фатир алу өчен сертификат тапшырды. Уфа – Казан юллары да күптән якынаеп беткән. Олуг юбилейда Уфаның татар телендә чыгып килүче “Кызыл таң” газетасы баш мөхәррире Фаил Фәтхет­динов һәм танылган язучы-сати­рик Марсель Сәлимов­ны күреп куандык. Кичәне оештыруда зур ярдәм күрсәткән­нәре өчен “Корстон” кунакханә-кү­ңел ачу комплексы җитәкчесе Рәис Мөбарәк­җановка һәм Г.Тукай исе­мен­дәге Татар дәүләт филармония­се җи­тәк­чесе Кадим Нуруллинга чиксез рәхмәтебезне белдерә­без!

Бүген “Яңа гасыр” телеканалында “Әйдә ТНВга!” бәйгесенең финалистлары ачыкланды. Бу хакта "Яңа Гасыр" телерадиокомпаниясе матбугат хезмәте хәбәр итә. 

Бүген, Радио көне уңаеннан, Казанның Иске татар бистәсендә "Болгар радиосы" эстрада җырчылары катнашында күңел ачу чарасы оештыра. "Татар-информ" мәгълүмат агентлыгы бу концертны онлайн күрсәтә.

"Концертта шоу-бизнес йолдызлары һәм "Болгар радиосы" алып баручылары катнашачак. Тамашага керү бушлай", - дип хәбәр ителә радионың социаль челтәрдәге рәсми төркемендә. Концерт 17.00 сәгатьтә башлана.

“Ватаным Татарстан” үз тарихында тугызынчы хәйрия чарасын оештырды.

«Татмедиа» Республика матбугат һәм массакүләм коммуникацияләр агентлыгы Татарстан Республикасының массакүләм мәгълүмат чаралары арасында антиэкстремистик тематикасы буенча иң яхшы журналист эшенә конкурс игълан итте. Гаризалар катнашучылардан 20.02.2018 кабул ителә башлый.

ПОЛОЖЕНИЕ 

"Гаилә һәм мәктәп" һәм "Мәгариф" журналлары үз конкурсларында җиңүче балаларны һәм укытучыларны бүген Тукай залына җыеп, бүләкләде.

Искәртеп үтәбез, Тукай залы татар язучылары өчен изге саналган урынга - хәзерге "Ногай" кунакханәсенә урнашкан. Бу бинада заманында газета редакцияләре һәм Татарстан китап нәшрияты эшләде. Бинаның конференцияләр залы Тукай залы булып калды һәм "Татмедиа" җәмгыяте белән Татарстан китап нәшрияты үзенең кичәләрен биредә уздыра.

"Гаилә һәм мәктәп" журналының "Тукайның әкият дөньясында" һәм "Мәгариф" журналының "Моңлы саз чыңнары" конкурсларына барлыгы 400дән артык бала һәм укытучы катнашкан. "Гаилә һәм мәктәп" журналының "Тукайның әкият дөньясында" конкурсы Тукай әкиятләре буенча рәсем һәм эшләнмәләрне кабул итеп алса, "Мәгариф" журналының "Моңлы саз чыңнары" конкурсы укытучылар һәм балалар бакчалары тәрбиячеләренең Тукай темасына багышланган дәрес эшкәртмәләре буенча җиңүчеләрне билгеләде.

Җиңүчеләрне "Татмедиа" ААҖ генераль директоры урынбасары, "Мәгариф" журналының филиалы директоры Сөмбел Таишева, Тукай исемендәге Дәүләт премияләре лауреатлары Равил Фәйзуллин, Зиннур Мансуров, Камил Кәримов сәламләде.

Равил Фәйзуллин бу залның иҗат кешесе өчен изге булуына, биредә 50-60 еллар дәвамында язучылар җыелуын хәбәр итте. Конкурста катнашучыларның эшләрен Тукай шәхесе аша дөньяга караш диеп бәяләде. "Минем дипломым буенча һөнәрем татар теле һәм әдәбияты укытучысы. Əмма бер көн дә укытучы булып эшләргә туры килмәде. Без чын укытучылар алдында баш ияргә тиеш", диде ул. Зиннур Мансуров Тукайның иҗаты аша тәрбияләвен искртеп, аның бер шигырен укыды. Яңа гына Тукай премиясе лауреаты булган Камил Кәримов картайгач яза башлаучыларга караганда, балачактан иҗат белән шөгыльләнүчеләрне югары бәяләвен ассызыклады. Сөмбел Таишева журналларның конкурсларны еш уздыруын искәртеп үтте, эшләрнең югары сыйфатлы булуын ассызыклады.

"Гаилә һәм мәктәп" журналы "Тукайның әкият дөньясында" конкурсын март аенда игълан иткән. Ай ярым эчендә конкурска 300дән артык эш килгән. Жюри рәисе - "Чаян" журналының баш рәссамы Александр Алешин.

Оештыручылар балалар эшләренең "Иң яхшы рәсем", "Иң яхшы эшләнмә" номинацияләрендә һәм 4 - 9, 10 - 15 яшь категориясенә бүленүен искәртте. Җиңүчеләрне Александр Алешин тәбрикләде һәм редакция бүләкләрен тапшырды.

Шунысы игътибарга лаек, җиңүчеләрнең берсен - Илнур Нуриевны "Чаян" журналы хезмәттәшлеккә чакырды.

Укытучылар һәм тәрбиячеләр "Шагыйрьнең тормыш юлы", "Тукайның иҗат дөньясы" номинацияләрендә бүләкләнде.

Ике редакция барысы 16 баланы, 6 педагогны бүләкләде. 10 педагогка редакциянең Рәхмәт хатлары тапшырылды.

Кичә музыкаль номерлар белән аралашып барды. Катнашучылар аеруча Илһам Шакиров репертуарындагы "Идел буе каеннары"н җырлаган Кирилл Михайловны алкышлады.

Бүләкләү тантанасы "Туган тел" җыры белән тәмамланды. 

Газетабызның юбилее якынлашкан көннәр. “Утыз көн уразаның бер көн гаете булган кебек, йөз еллык юбилеебыз килеп җитте.

Бүген “Татмедиа” гаммәви коммуникация чаралары агентлыгы җитәкчесе Айрат Зарипов бер төркем алдынгы журналистны бүләкләде. Бүләкләнүчеләр арасында “Татар-информ” мәгълүмат агентлыгы хезмәткәрләре дә бар.

“Бүген без бу залга май бәйрәмнәре алдыннан, бәйрәмчә язгы кәеф булдырырга җыелдык. Мин сезнең белән эшләвемә һәм тормыш куйган мәсьәләләрне бергә чишә алуыма шатмын”, – диде Айрат Зарипов сәламләү сүзендә. - Шулай ук мин бүген сезнең һәрберегезгә тирән рәхмәт хисләре җиткерүем белән дә бәхетле. Алга таба да мондый рәхәт күрешүләр өчен сәбәпләр булыр дип өметләнәм. Мин сезнең һәрберегезгә иминлек, тынычлык, уңышлар телим. Өйләрегез бала тавышыннан яңгырап торсын, һәрвакыт хәзерге кебек яраткан эшегез белән шөгыльләнергә мөмкинлегегез булсын. Уртак эшебез һәм бергә ирешелгән уңышларыбыз өчен рәхмәт. Сезнең ярдәмнән башка гына без алга куелган максатларга ирешә алмаган булыр идек”. 
Кереш өлештән соң җитәкче, үз сүзләре белән әйткәндә, “тантананың иң күңелле мизгеле”нә – бүләкләү өлешенә күчте.

ТР Президенты карары белән, “Татмедиа” ачык акционерлык җитәкчесе урынбасары Әлфия Әдиятова “Татарстанның атказанган массакүләм-коммуникацияләр хезмәткәре” исеменә лаек булды.

Күпьеллык нәтиҗәле хезмәте һәм массакүләм мәгълүмат чараларын үстерүгә керткән зур өлеше өчен “Чаян” журналының бүлек мөхәррире Людмила Сафиуллина Рәхмәт хаты белән бүләкләнде.

РФ Президенты сайлауларына әзерлек һәм үткәрүдә актив катнашкан өчен “Татмедиа” гаммәви коммуникация чаралары агентлыгының Мактау кәгазе белән “Татар-информ” мәгълүмат агентлыгы хезмәткәрләре - татар редакциясе баш мөхәррире Рәмис Латыйпов, штаттан тыш видеооператор - Яков Абрамов, корреспондент Гөлнар Гарифуллина, рус редакциясе корреспонденты Арсений Маврин, “Татмедиа”ның гомуми бүлегенең әйдәп баручы белгече Ләйлә Әнвәрова, массакүләм коммуникацияләр департаменты җитәкчесе Вәсилә Сабирова бүләкләнде.

“Татмедиа”ның шундый ук эчтәлектәге Рәхмәт хатлары белән “Татар-информ” мәгълүмат агентлыгының татар редакциясе шеф-редакторы Алсу Исмәгыйлева, яңалыклар редакторы Гөлназ Әхтәмьянова, монтаж режиссеры Альбина Квасова, корреспондентлар Илзирә Гиздуллина, Ләйлә Хәкимова һәм Чулпан Шакирова бүләкләнде. Шулай ук Айрат Зарипов кулыннан Рәхмәт хатларын “Татмедиа” акционерлык оешмасы смм-менеджеры Илһам Ибраһимов, юридик департамент җитәкчесе Игорь Аюшев һәм “Татар-информ” мәгълүмат агентлыгының рус редакциясе баш редакторы Василина Олейник та алды.

“Әдәби марафон” бәйгесенең өченче финалына үтүчеләрнең 98 проценты хатын-кыз. 82 кешенең 81е хатын кыз, бердәнбер ир-ат - Раил Гатауллин. Бу хакта бәйгенең финалистларын бүләкләү тантанасында билгеле булды. Чарада "Татар-информ" хәбәрчесе дә катнашты.

Шагыйрь Газинур Морат моңа карата үз фикерен белдереп: “Безнең милләттә күп нәрсәләрнең язмышы хатын-кыз кулында. Бәйге нәтиҗәләреннән күренә: китапларныкы да. Кайсы милләтне алсак та, аның язмышы турында ахыр чиктә китаптан укып беләчәкбез”, - диде.

Акция 1 – 21 апрельдә барды. Катнашучылар көн саен үзләре укыган татарча әдәби китаплардан ошаткан өзекләрен #әдәбимарафон хэштегы белән Интернеттагы сәхифәләренә урнаштырырга тиеш иде.

Финалистларны бүләкләү “Ногай” кунакханәсенең Тукай залында үтте. Кичәдә Галимҗан Гыйльманов, Газинур Морат, Гөлсинә Галимуллина, Ленар Шәех, Радик Сабиров катнашты. Финалга үткән 82 кеше бүләкләү өчен чакырылган иде. Марафон финалистлары, татарча китапларны иң күп укучылар буларак, Татарстан китап нәшриятында чыккан яңа китаплар белән танышты.

Бәйге Татарстан китап нәшрияты белән берлектә уздырыла. Марафонны оештыручы Раил Гатауллин фикеренчә, гамәлне гадәткә кертү өчен 21 көн кирәк. Аның максаты - марафончыларда көн саен татарча китап уку гадәте барлыкка китерү.

Финалга үтү өчен, катнашучылар #әдәбимарафон хэштегы белән әдәби әсәрдән өзекләрне Интернетка 21 көн дәвамында урнаштырып барды. Җиңүчеләр куелган язмалар белән уртаклашучылар һәм лайклар саны буенча билгеләнде.

Өченче урынны Резеда Шәйхаттарова, Лилия Хисмәтуллина, Айгөл Талипова, Әлфинур Зарипова, икенче урынны Айсылу Галиева һәм Сәвия Тимершина алды. Беренче урынга марафонны үткәрүче Раил Гатауллин да ия булырга тиеш иде, ләкин бердәнбер җиңүче итеп ул Биектау китапханәсе директоры Лилия Хәмидуллинаны билгеләде.

“Ватаным Татарстан” газетасы 100 еллык юбилеен хәйрия концерты уздырып каршылаячак. Бу хакта бүген “Татар-информ”да газета юбилеена багышланган матбугат конференциясендә билгеле булды.

“Утыз көн уразаның бер көн гаете була дигән кебек, безнең дә 100 еллык юбилеебыз килеп җиткән”, – диде газетаның баш мөхәррире Миңназыйм Сәфәров. – 100 яшь әз түгел, дип әйттеләр безгә. Әмма ул кеше өчен күп, шундый зур тарихлы халыкка газета өчен күп түгел. “Ватаным Татарстан” (“Социалистик Татарстан”) - совет заманының законлы баласы.

Миңназыйм Сәфәров фикеренчә, сыйфатлы матбугат өчен 100 ел зур вакыйга була алмый. “Газетаның исеме алыштырылган, вакыт та заман белән бергә атлаган, аның кыйбласы да үзгәргән. Ләкин журналистлар җил искән уңайга тиз генә авышырга да тиеш түгел. Безнең миссиябез шул: хакимият белән халык арасындагы күперне саклау өчен барлыкка китерелгән матбугат чарасы без”, – диде баш мөхәррир. 

“Ватаным Татарстан” басмасы үзенең бер гасырлык юбилеен хәйрия концерты итеп уздырырга җыена. “Матур итеп, зурлап бәйрәм итәргә җыенабыз, – диде баш мөхәррир урынбасары Илнар Хөснуллин. – Әмма икенче көнне газета чыгарасы бар, аның турында да онытырга ярамый. Газетаның рәсми чыккан беренче саны – 1918 елның 12 мартына туры килә. Шул көннән башлап, котлаулар ала башладык.

Ничек кенә сәер булса да, редакция эчендә төрле социаль проектларыбыз да бар. Аларны пиар компания буларак та бәяләүчеләр булыр. Әмма аларның күбесе кешегә һәм милләткә хезмәт итү булсын дигән теләктә башкарыла. 
2013 елдан бирле журналист Гөлгенә Шиһапова башлангычы белән хәйрия концертларына старт биргән идек. Газетаның җомга санында “Кайсыгызның кулы җылы” дигән сәхифә бар. Ул ун еллап чыга инде. Әмма 2013 елдан без мохтаҗ кешеләр өчен чаралар, кичәләр уздыра башладык. Эстрада артистлары, безнең дусларыбыз ярдәме белән 8 тапкыр хәйрия концерты уздырдык. Аның 6сы - “Сәйдәш” концертлар залында. Тагын икесе Тинчурин һәм “Юность” залларында узды.

Илнар Хөснуллин сүзләренчә, газета юбилее мактау-котлауга, бүләк өләшүгә генә кайтып калырга тиеш түгел. 
“100 еллык туган көнебез гади бер концерт кына булып калмасын дигән фикергә килдек тә, кемгәдер ярдәме тисен дигән ният белән хәйрия концерты уздырырга булдык. Җыелган акчалар юл һәлакәтеннән зыян күргән егет - Биектау районының Дөбъяз авылында яшәүче Илнар Хәлиуллинга ярдәм буларак җибәреләчәк.

Туган көн концерты 3 майда, 17.00 сәгатьтә Филармония концертлар залында булачак”, – диде баш мөхәррир урынбасары.

Шулай ук ул чараларның концерт белән генә чикләнмәвен дә әйтеп узды.
“100 ел кечкенә дата түгел. Ел дәвамында башка проектларыбыз да булыр дигән өметтә калабыз”, - диде Хөснуллин.