ЯҢАЛЫКЛАР
Чит илләрдә популяр “Азу” хәләл-кафе пешекчеләре Венера Едзгверидзе һәм Алия Фәссахова ашамлыкны әзерләп карарга теләк белдергән кызлар белән бергә татлы, ягъни каклы һәм кипкән җиләк-җимешле татар милли витаминлы десерт әзерләү мастер-классы үткәрделәр. Мастер-класс бүген IT-паркта үтте.
“Татар-информ” мәгълүмат агентлыгы хәбәрчесе “Азу” татар кухнясы кафесы шеф-пешекчесе Венера Едзгверидзе белән татлы әзерләү нечкәлекләре һәм бүгенге мастер-класс үзенчәлекләре турында сөйләште. “Татлы дигән десерт термик эшкәртү таләп итми, шул сәбәпле бүгенге мастер-класста без нәкъ менә шушы ризыкны әзерләп күрсәттек. Безгә монда плитәләр белән эшләү бик кыен булыр иде. Татлы – IT-паркта әзерләп күрсәтеп була торган иң оптималь ашамлык”, - диде шеф-пешекче.
Венера Едзгверидзе сүзләренчә, “Азу” кафесы бар тикшерүләрне дә бик уңышлы үткән. “Казанда безнең 3 кафебыз бар, тиздән дүртенчесе ачылачак. Безнең кафе беренчеләрдән булып тикшерү комитетыннан бездә хәләл ризык һәм табигый продукт булу сәбәпле, әзерләргә һәм пешерергә рөхсәт алды. Тикшерү бик дәвамлы һәм таяныч булуга карамастан, без аны үттек”, - диде пешекче.
“Азу” кафесының шеф-пешекчесе сүзләренчә, әлеге хәләл-кафе чит ил кунаклары арасында бик популяр. “Германиядән, Кытайдан, Англиядән килгән кунаклар безнең ашамлыкларны мактап туялмыйлар. Һәм бу күренеш футбол буенча дөнья чемпионаты вакытына гына кагылмый. Безнең кафе чит илләрдә бик популяр. Чит ил кунаклары безгә үзләрендә дә нәкъ менә татар кухнясы булган кафебызны ачарга тәкъдим иттеләр”, - диде шеф-пешекче.
Венера Едзгверидзе сүзләренчә, гурманнар арасында иң популяр ризык ул, берсүзсез, чәкчәк. “Татар чәкчәген бар җирдә дә беләләр”, - ди ул.
“Татлы – бик арзан ашамлык. Өйдә әзерләсәң дә, безнең кафеда сатып алсаң да, барыбер кыйммәт түгел. Безнең татлыга еш кына өйгә алып китү максатыннан заказ бирәләр. Өйгә китерү бездә юк, заказ бирүче үз ашамлыгын үзе алып китә. Мин бүгенге мастер-класста татлы әзерләү идеясен үзем тәкъдим иттем, чөнки татлы тәмле, баллы һәм бик күп көч куюны тәлап итмәгән ашамлык”, - дип тәмамлады “Азу” татар кухнясы кафесы шеф-пешекчесе Венера Едзгверидзе.
Яшел Үзән районының Кече Шырдан авылы халкының бердәмлегенә һәм үҗәтлегенә бәйге барышында ук сокланган идек. Ә килеп төшкәч авылы үзенең табигате, саф һавасы, тырыш, ихлас кешеләре белән бер күрүдән яраттырды. «ШК» десанты анда Сабантуенда катнашып, җырлап, биеп, Пушкин яратып ашаган Шырдан катыгыннан авыз итеп, Каюм Насыйри рецепты буенча пешерелгән чәй, чишмә суларын эчеп, бәйгегә нәтиҗә ясап кайтты.
Кече Шырданга кунакка эстрадабызның танылган җырчылары Ришат Фазлыйәхмәтов, Рәсим Фасыйхов, Альбина Кармышева, сүз остасы Алмаз Хәмзинны чакырдык. Бик күңелле, җанлы, рәхәт бәйрәм булды.
Нинди авыр елларда да Сабан туен уздырмый калмаган шырданлылар. Ә менә мондые беренче тапкыр узды, диләр. «30 ел артистларның килгәне юк иде», – ди авылның мәдәният йорты җитәкчесе Рамил Шакиров. Халык артистларга кушылып биеде дә, җырлады да, уеннарда да катнашты.
Газетага язылучылар арасында бүләкләр дә уйнатылды. «Шәһри Казан»ны ун ел яздыручы тугры укучыбыз Фәрит Мозаффаровка редакторыбыз аерым бүләк тапшырды. Сабан туе көрәшсез булмый. Абсолют батыр булып Олы Шырдан авылы егете Динар Хуҗин калды.
Бәйрәмгә, кунакларны каршыларга зурдан кубып әзерләнгән шырданлылар. Аларга күрше авыллар да ярдәм иткән. Сабан туен күрергә дип килгән Ачасыр авылы кызлары чишмәдә чиләкләр юа, Норлат авылы мәдәният йорты хезмәткәрләре музыкаль бизәлешне кайгырта, Акъегет авылыннан килгән кунаклар мәйданда булыша. Бәйрәм барысын да берләштергән. Бик кыска вакыт эчендә авыл уртасында ук зур гына «Чәй йорты» төзеп куйганнар. Зәвык белән эшләнгән бу җәйге кафе искиткеч матур. Анда безне 50 елдан артык умартачылык белән шөгыльләнүче Ринат абый Миңнуллинның яңа гына суырткан балы, Кече Шырданда гына җитештерелә торган экологик яктан чиста, сыйфатлы ризыклар белән сыйладылар (бу тырыш кешеләр турында газетабызның киләсе саннарында язарбыз). Махсус бренд булдырганнар. Шырдан эко-продукциясен киләчәктә туристларга да тәкъдим итәргә җыеналар.
Кече Шырдан бай тарихлы авыл, аның барлыкка килүе Болгар чорларына ук барып тоташа. Авыл кырыендагы изгеләр зиратында 14-15 йөзгә караган каберлекләр дә бар. Ул Татарстанның тарихи һәйкәлләр исемлегенә кертелгән. Кече Шырдан – галим, мәгърифәтче Каюм Насыйриның туган авылы. Авыл кечкенә булса да, аның киләчәге өметле.
– Кече Шырданда сугышта һәлак булганнар истәлегенә һәйкәл ачылды, аннары чишмәләрне төзекләндердек, былтыр Каюм Насыйри мәчетен яңарттык, – дип авыл белән ташытырды Олы Шырдан авылы башлыгы Рәис Кәримов.
Авылда күп эш иганәче – шушы авыл кешесе Асия Гобәйдуллина җитәкчелегендәге «Аквидук» оешмасы ярдәмендә башкарыла. Тиздән авылны туристик үзәккә әйләндерергә телиләр. Бай табигатьле, зур тарихы булган авылга тагын килергә, Каюм Насыйри эзләре буйлап урам урарга, Кече Шырданның кунакчыл, киң күңелле халкы белән кабат аралашырга язсын.
"Казахстандагы "Татарстан – Яңа гасыр" корпункты ике республика арасындагы дуслык мөнәсәбәтләрен тагын да ныгытыр", диде Татарстан Президенты.
“Әгәр каты итеп ясалмаса, татарларда “Мәскәү күренә бит, ник ясадың мондый чәй” дип әйтү гадәткә кергән”, - ди Гадел Шәрипов.
«Татарстан хәбәрләре» тапшыруының алып баручысы һәм хәбәрчесе Айгөл Бәдретдинова җиде елдан артык «Яңа Гасыр» телерадиокомпаниясендә эшли. Айгөл белән ТНВдагы эшчәнлеге һәм шәхси тормышы турында әңгәмә кордык.
"Казинформ"да "Татар-информ" хәбәрләрен һәм "ТНВ" тапшыруларын карап баралар, диде Милли Шура рәисе.
Хәлил Шәйхетдинов әлегә көрәшне күбрәк татар басмалары гына яктыртуын әйтте.
Хөрмәтле журналистлар! Татарстан Республикасының социаль юнәлештәге коммерциячел булмаган оешмалары эшчәнлеген иң яхшы яктыртуга конкурс игълан ителде. Сезне әлеге конкурста канашырга чакырабыз!
Конкурс түбәндәге номинацияләр буенча үткәрелә:
«Татарстан Республикасының социаль юнәлештәге коммерциячел булмаган оешмалары эшчәнлеген яктырткан иң яхшы телесюжет (яки телетапшыру)»;
«Татарстан Республикасының социаль юнәлештәге коммерциячел булмаган оешмалары эшчәнлеген яктырткан иң яхшы радиосюжет (яки радиотапшыру)»;
«Басма массакүләм мәгълүмат чараларында Татарстан Республикасының социаль юнәлештәге коммерциячел булмаган оешмалары эшчәнлеген яктырткан иң яхшы язма»;
«Интернет» мәгълүмат-телекоммуникация челтәрендә Татарстан Республикасының социаль юнәлештәге коммерциячел булмаган оешмалары эшчәнлеген яктырткан иң яхшы язма».
Документлар 2018 елның 3 сентябренә кадәр (бу датаны да кертеп) «Татарстан Республикасының социаль юнәлештәге коммерциячел булмаган оешмалары эшчәнлеген иң яхшы яктыртуга конкурс» билгесе белән “Татмедиа” матбугат һәм массакүләм коммуникацияләр буенча республика агентлыгына (420066, Татарстан Республикасы, Казан шәһәре, Декабристлар ур., 2 нче йорт, 6 кат (матбугат хезмәтләре һәм иҗтимагый оешмалар белән эшләү бүлеге) китереп тапшырыла, почта аша яки konkurs.nko@tatar.ru электрон почтасы аша җибәрелә, белешмәләр өчен тел.: 8(843) 570-31-04 (Шакирова Регина).
Хөрмәтле газета укучыларыбыз! 2018 елның икенче яртыеллыгына «Туган як»ка язылу кампаниясе ахырына якынлаша. Әгәр әлегә кадәр газетага язылырга өлгермәгән булсагыз, бу эшне соңгы көнгә калдырмагыз. Газетага язылсагыз,«Туган як»тан бүләк» конкурсына да катнаша алачаксыз.
Конкурсның шартлары түбәндәгечә: анда «Туган як» газетасына икенче яртыеллыкка язылучылардан (квитанциягез булу мәҗбүри) теләгән һәркем катнаша ала. Моның өчен газетабызда басылып чыккан шушы купонны (бу санда кабатлап басабыз) тутырып һәм «Туган як»ка язылу турындагы квитанциягезнең копиясен редакциягә китереп бирергә, почта яки электрон почта аша җибәрергә кирәк. Шулай булганда гына конкурста катнашучылар исемлегенә кертеләчәксез. 2018 елның икенче яртысына «Туган як»ка язылучылар өчен «Туган як»тан бүләк» конкурсы июль аенда уздырылачак (төгәл көнен соңрак язарбыз).
Тагын шунысы да бар: киләсе атна башыннан (25.06.2018) редакциягә килеп язылучыларга төрле бүләкләр дә бирәчәкбез.
Казанның Тынычлык бистәсендә Каенлыкта узган Сабан туенда чит ил һәм Россия журналистлары кунак булды.
Футбол буенча Дөнья чемпионаты кысаларында узучы матчларны яктырту өчен шәһәр матбугат үзәгенә һәм ФИФА уеннарына аккредитация үткән журналистлар иң элек Алексеевск районы оештырган мәйданчык белән танышты. Алар биредә рус халык өендә кунак булды, балдан ясалган медовуха эчемлеген татып карады. Тимерчелек, туку, балчыктан эшләнмәләр ясау остаханәләрендә булды. Таяк тартышу, чүлмәк вату, капчык киеп йөгерү кебек уеннарда катнашты.
Нурлат районы мәйданчыгында чит ил коллегаларыбызны җыр-биюләр аеруча кызыксындырды.
Төп мәйдандагы тамашаны - берьюлы йөзләрчә биючене күреп таң калдылар. Чит ил журналистларының барысы да диярлек бу күренешне фото-видеога төшерде, Инстаграм кушымтасы аркылы "Туры элемтә" оештырып, Сабан туе бизәкләрен ватандашларына күрсәтте.
Чит ил журналистларын көрәш тә кызыксындырды. "Бу кешеләр бәйрәмдә ник сугыша?" дип сорады Кытай вәкиле. Волонтерлар аңа көрәш - Сабан туеның төп уеннарының берсе икәнен аңлатты. Шулай ук коллегаларыбыз игътибарын алып баручыларның бәйрәмне ике телдә алып баруы да җәлеп итте. "Алар икесе дә бер дин тотамы?" дип сорады алар.
"Татар-информ" хәбәрчесе коллегаларыннан тәэсирләре турында сорашты.
"Безгә күрсәткән игътибар, телеңне йотарлык тәмле ризыклар ошады. Костюмнар искиткеч! Шундый матурлар, төсле-төсле. Ризыклардан төрле ит ризыклары, чәкчәк һәм пәхләвә телеңне йотарлык. Шәрабтан да авыз иттек, бик уңган! Кайбер ризыкларны беренче тапкыр гына татып карадым. Телеңне йотарлык. Мин Казанга кабат килер идем", - диде Колумбиядән Рамирез Сониано Маниэль де Хесус "Татар-информ" хәбәрчесенә.
Колумбиянең тагын бер вәкиле Джонхайро Валенсия Сабан туен "үз иленә кайткач та озак вакыт искә алырмын" диде. "Мин Сабан туен ике генә сүз белән тасвирлый алам: искиткеч һәм могҗизалы. Миңа сальса күбрәк ошый, әмма сезнең мәдәният белән танышу да кызык булды. Бәйгеләрдә дә катнашырга өлгердем. Менә шкатулка бирделәр. Ит ризыкларының нинди генә юк. Өстәлләр сыгылып тора", - диде ул.
Диас Гансало татарларның юмартлыгына таң калган. "Таяк тартышу уенында өч тапкыр катнаштым һәм өчесендә дә җиңдем", - диде ул, хатирәләрен уртаклашып. Аңа бүләккә мунчада башка кия торган киез эшләпә биргәннәр. Әмма аның ни икәнен белми, татарларның милли баш киеме дип уйлый. Әлеге баш киеменең ни икәнен аңлаткач, ул телдән калды. Мондый баш киемен күргәне булмаган.
"Бәйрәмнең оештырылу дәрәҗәсе искиткеч, иң югары ноктада. Монда олылар да, балалар да күңел ача. Бар җирдә тәртип, чисталык. Исерткеч эчемлекләр юк дәрәҗәсендә. Менә, медовуха шәп",- диде башкала кунагы.
Диас Гансало Татарстанда гына түгел, Россиядә дә беренче тапкыр. "Безне бу кадәр каршы алырлар, кунак итәрләр дип уйламаган идек. Искиткеч! Татарлар шундый кунакчыл, юмарт, бердәм, дус халык. Сездә шулкадәр ризык, мең төрле. Татарлар беркайчан да ачтан үлмәячәк. Саранскины, Мәскәүне, Татарстанны күрдек. Сездә халык бердәм, берләшә белә", - диде ул.