Айдар Сәлимгәрәев: Яңа медиа фестивале журналистларга иҗат өчен инструментлар бирәчәк

«Мирас» балалар лагерендә «Татмедиа» холдингы оештырган өч көнлек Яңа медиа фестивале башланып китте. «Татмедиа» республика матбугат һәм массакүләм коммуникацияләр агентлыгы җитәкчесе Айдар Сәлимгәрәев «Татар-информ»га вакыйганың бурычлары һәм уникаль форматы турында сөйләде, дип яза хәбәрче Чулпан Шакирова.

«Барлык район, шәһәр һәм республика басмалары тәкъдим ителгән. Бу чара яңа медиа белән кызыксынучы кешеләр өчен. Без аларга белемнәрен, күнекмәләрен арттырырга мөмкинлек бирергә телибез», - диде Сәлимгәрәев.

Фестивальнең төп максаты итеп ул көндәлек эш белән көрәшү һәм иҗат өчен вакыт бушатуны атады. «Көндәлек эш бик күп вакытны ала. Безнең бурыч – катнашучыларны иҗатка күбрәк вакыт бирү өчен инструментлар белән тәэмин итү», - дип аңлатты агентлык җитәкчесе.

Ул шулай ук эш күләме арту яңа алымнар таләп итә, дип ассызыклады. «Эш күләме бик зур, ул торган саен арта гына бара. Без, ясалма фәһем белән эшләргә өйрәтеп, барысына да өлгерергә һәм уңышлы булырга мөмкинлек бирә алачакбыз, дип уйлыйбыз», - диде Сәлимгәрәев.

«Татмедиа» җитәкчесе күчмә лагерь форматын сайлауны аерым аңлатты. Аның сүзләренчә, мондый формат уку процессына турысынча бирелергә һәм игътибарны читкә юнәлтмәскә мөмкинлек бирә. «Уку вакытында шалтыратулар, аралашу, интернет кебек нәрсәләр комачауламый, яңа белемнәр яхшырак сеңә», – дип аңлатты ул.

Аның фикеренчә, мондый формат фикердәшләр бергәлеген булдырырга ярдәм итә. «Укучыларыбыз бик күп булуларын, зур команда булып эшләүләрен аңлавы бик мөһим. Бу берләштерә дә, тәҗрибә алышырга да ярдәм итә. Алар тәҗрибә алмашу һәм яңа эшләнмәләр белән уртаклашу өчен мәйданчык булдырыр, дип уйлыйм. Бу бик мөһим», - дип йомгаклады сүзен Айдар Сәлимгәрәев.

Яңа медиа фестивале 16 октябрьгә кадәр дәвам итәчәк. Катнашучыларны федераль һәм эчке экспертлардан ясалма фәһем, видеоконтент һәм SMM буенча мастер-класслар көтә.