«Алтын каләм – Золотое перо» җиңүчеләре билгеле!
Фестиваль нәтиҗәләре буенча ике Гран-при иясе Журналистика һәм медиакоммуникацияләр югары мәктәбендә грант акчалары исәбенә белем алу мөмкинлегенә ия булды.
Балалар, яшүсмерләр һәм яшьләр арасында «Алтын каләм – Золотое перо» XXVII республика фестивале җиңүчеләрен бүләкләү тантанасы булды.
Фестиваль 27 ел дәвамында үткәрелә, ул яшь журналистларны ачыкларга, аларга ярдәм итәргә һәм лаеклыларны бүләкләргә ярдәм итә. Быел 12 – 20 яшьлек 170 катнашучы җиде көн дәвамында көнне төнгә ялгап язарга, камерага төшерергә, монтажларга, калыпка салырга, тавыш яздырырга, кыскасы, сыйфатлы материаллар эшләргә өйрәнде.
XXVII фестивальдә эшчәнлек җиде юнәлеш буенча оештырылган иде: басма журналистика (рус һәм татар), телевидение, радио, дизайн һәм верстка, фотожурналистика, SMM. Төп темалар итеп түбәндәгеләр сайланган: «Мин Россияне төзим!», «Авылым көче. Авыл яшьләренең үсеш территориясе», «Цифрлы дөнья: Татарстан Республикасында цифрлаштыру елы», һ.б.
«Алтын каләм – Золотое перо» җиңүчеләренә бүләкләрне фестивальгә килгән кунаклар, оештыручылар һәм фестивальнең остазлары тапшырды: Татарстан Республикасы Дәүләт Советы депутаты Римма Ратникова, “Татмедиа” республика матбугат һәм массакүләм коммуникацияләр агентлыгы җитәкчесе Айдар Сәлимгәрәев, Татарстан Республикасы яшьләр эшләре министры Тимур Сөләйманов, ТАССРның һәм Россия Федерациясенең атказанган артисты, журналист Лия Заһидуллина һ.б.
«Фестиваль озак еллардан бирле үткәрелә, ләкин һәрвакыт ул нинди дә булса яңалык алып килә. "Алтын каләм" күпме талантлы яшьләрне ачарга ярдәм итте! Бу – бик күркәм фестиваль, ничәмә-ничә буын журналистлары үзләренең иҗат юлын бу фестивальдән башлаган. Катнашучыларга битараф булмаганнары өчен «рәхмәт» әйтәсе һәм биредә кабызган очкынны сүндерми саклауларын телисе килә», – диде Айдар Сәлимгәрәев, катнашучыларны сәламләү сүзендә.
Татарстан Республикасы Дәүләт Советы депутаты Римма Ратникова фестивальдә катнашучыларга, узган көннәрнең иң җылы, иң якты мизгелләрен искә төшереп, шулай ук рәхмәт сүзләре әйтте һәм уңышлар теләде.
«Фестивальнең белем, эзләнү, иҗат, шатлыклар белән тулы җиде көне узып та китте. Без журналистика хакында сөйләштек. Сезне борчыган сораулар күп һәм төрле. Аларга җавапларны да бергә эзләдек, – диде Р.Ратникова. – Минем уйлавымча, сез бу көннәрдә журналистиканың җәмгыятькә хезмәт итү, ялган һәм дөреслек, яхшылык һәм явызлык, гаделлек һәм гаделсезлек арасындагы мәңгелек көрәш икәнен аңлагансыздыр. Кадерле балалар, журналистиканың киләчәге яхшы кулларда булыр дип ышанам».
Фестивальнең төп бүләгенә – Гран-прига Гөлназ Әхмәдиева һәм Софья Волостнова ия булды. Кызларга Татарстан Республикасы бюджетыннан бүлеп бирелгән грант акчалары исәбенә Казан федераль университетының Журналистика һәм медиакоммуникацияләр югары мәктәбендә белем алу мөмкинлеге биреләчәк.