“Татмедиа” республика матбугат һәм массакүләм коммуникацияләр агентлыгы җитәкчесенә Россия Президенты бүләге тапшырылды.
Бу олы бүләккә А. Сәлимгәрәев иҗтимагый әһәмияткә ия чараларны үткәргәндә керткән өлеше өчен лаек булды. Бүләк Казан Кремлендә Россия көненә багышлап үткәрелгән тантанада тапшырылды.
Р.Миңнеханов җыелган затларны бәйрәм белән котлады һәм «Без мең еллык тарихы һәм мәдәни мирасы булган илдә яшәвебез белән горурланабыз. Халкыбызның тырыш хезмәте, Россия Федерациясе Президенты В. Путинның ярдәме белән республикабыз илнең алдынгы төбәкләренең берсенә, таянычына әверелде», дип белдерде.
Аның әйтүенчә, Татарстанның халык тормышын яхшыртуга, көчле Ватан төзүгә йөз тоткан курсны яклавы, үз эшенә бирелгән халкы барәбәренә икътисад, фән, мәгариф, медицина, мәдәният, идарә һ.б. өлкәләрдә иң кыю башлангычлар тормышка ашырыла.
Дәүләт бүләкләре лауреатларына мөрәҗәгать итеп, Р. Миңнеханов аларның илнең социаль-икътисадый үсешенә, Россияне үстерүгә, аның куәтен ныгытуга керткән өлеше хакында билгеләп үтте һәм «сезнең талантыгыз, эштәге фидакарьлегегез республиканы көчле һәм алдынгы итә» дип ассызыклады.