Татарстан китап нәшрияты сигезенче «Кызыл мәйдан» китап фестивалендә катнаша

Россия башкаласы үзәгендә 3 – 6 июньдә илнең төп әдәби вакыйгасы узачак.

Мәскәү халкы һәм башкала кунаклары ярата торган зур әдәби бәйрәм быел традицион форматта оештырыла һәм кабат язучыларны, шагыйрьләрны, китапханәчеләрне, актерларны, музыкантларны һәм, әлбәттә, меңнәрчә укучыны берләштерәчәк. Миллионлаган тамашачы фестивальнең төп вакыйгаларын популяр интернет-платформаларда барачак онлайн трансляция аша күрә алачак. Программага илнең танылган матур әдәбият, фәнни-популяр әдәбият һәм балалар әдәбияты авторлары, әйдәп баручы театрлар һәм музыка коллективлары катнашында 400 дән артык вакыйга кертелгән.

«Россия төбәкләре» мәйданчыгында Россия Федерациясенең 50 төбәгеннән килгән нәшерләр җыелачак, алар арасында Татарстан китап нәшрияты да бар, ул тамашачыларга киң ассортимент – 300 төрле китап (2 мең данәдән артык) тәкъдим итәчәк. Нәшрият стенды «Россия төбәкләре» павильонының 16 нчы чатырында урнашачак («Татарстан Республикасы/Татарстан китап нәшрияты» стенды, 16-17 урын).

Биредә балалар китаплары, фәнни-популяр һәм тарихи басмалар, туган якны өйрәнү һәм сәнгать буенча китаплар, альбомнар сатып алырга мөмкин булачак. Экспозиция ассортиментында нәшриятның 2020/2021 еллардагы әһәмиятле проектлары тәкъдим ителә, алар арасында түбәндәгеләр бар:

- «Татарская национальная кухня» альбомы, авторы –  Е.Л. Яковлева, Е.Л. Матвеева һәм башкалар;

- «Резьба по дереву» китап-альбомы, авторы –  Хәмит Латыйпов;

- «Становление искусства татарской рукописной и печатной книги XVII - начала XX в.» китап-альбомы, авторы –  Ф.Г. Ваһапова;

- «Как жили татары в средние века: история повседневности» китабы, төзүчесе – Гибатдинов М.М., Мортазина Л.Р.;

- «Великая Орда» тарихи романы, авторы – Ольга Иванова;

- «Булгаро-татарские государства, знаменитые правители» Фаяз Хуҗин авторлыгындагы тарихи басма;

- русча-татарча астрономия терминнары сүзлеге һ.б. басмалар.

Балалар өчен күпләр яратып өлгергән «Сказки народов Поволжья», » Г.Тукайның кабат нәшер ителгән «Шүрәле» китабы, А.Алиш әкиятләре, «Татарча-русча рәсемле тематик сүзлек» (авт.Ф.Харисов, Ч.Харисова), шул исәптән Татарстан Республикасы Президенты каршындагы Татар телен саклау һәм үстерү мәсьәләләре комиссиясе һәм «РОСМЭН» нәшриятының уртак проекты кысаларында чыгарылган  балалар  өчен энциклопедияләр: «Астрономия һәм космос», «Терек табигать», «Диңгезләр һәм океаннар», «Гаҗәеп хайваннар», «Футбол» китаплары бар.

Татар әдәбиятын яратучыларны елның иң әһәмиятле әдәби вакыйгасына чакырабыз! Фестивальгә керү ирекле. Эшләү вакыты: 10.00 сәгатьтән 22.00 сәгатькә кадәр.