«Чаллы ТВ» телерадиокомпаниясенә – 30!

“Чаллы ТВ” – шәһәрдәге беренче һәм ике телдә тапшырулар алып бара торган бердәнбер телекомпания. 30 ел эчендә үз эшенең осталарыннан торган команда Чаллы халкының ТКХ, юл хуҗалыгы, сәламәтлек саклау һ.б. өлкәләргә кагыла торган иң катлаулы проблемаларын чишәргә ярдәм итте. Каналның башлангычы турында хәтерләүчеләр дә күп түгелдер инде.

Телекомпания һәрвакыт бүгенге көн белән бергә атлады. 2020 елның маеннан югары чисталыктагы Full HD форматында күрсәтә башлады. Бу студия җиһазларын  яңарту бәрабәренә мөмкин булды. Full HD форматы рәсемне чиста итеп кенә түгел, тормышчан итеп тә күрсәтә.

2021 елда студиядә ремонт ясалды, тамашачылар белән бергәләп каналның төп төсен сайладылар. Күнегелгән кызыл-сары төсне яшкелт зәңгәр диңгез төсе алмаштырды.

Каналның яңа девизы барлыкка килде, студиянең тышкы күренеше үзгәрде,  ә иң мөһиме материалларны бирү ысулларына яңалыклар керде..

Бүген «Чаллы ТВ» телекомпаниясе –  һөнәри җиһазланган, заманча студиягә ия, креатив программалар тәкъдим итүче, турыдан-туры эфирда эшләүче, эксклюзив материалларга бай, яңалыкларны иң беренче җиткерә торган канал.

Моннан 30 ел элек булган кебек үк, Чаллы телевидениесе шәһәрдә ике телдә эшләүче бердәнбер канал булып кала бирә. Бу аңа Чаллы халкын гына түгел, Тукай районы, республиканың шул тирәдәге башка районнары халкын да җәлеп итәргә мөмкинлек бирә.