Татарстан хакимияте социаль мәйданчыкларны үзләштерә

Татарстанда министрлыклар һәм ведомстволарның бердәм рәвештә мессенджерлар һәм социаль челтәрләрнең яңа мәйданчыкларына күчүе төгәлләнә. «Диалог Регионы» коммерцияле булмаган автоном оешмасының аерымланган бүлекчәсе җитәкчесе урынбасары Эмилия Хәкимуллина шул турыда белдерде. Ул хакимият органнарының цифрлы форматта яңа мәйданчыкларны ничек үзләштерүләре турында «Татар-информ»га сөйләде.

Эмилия Хәкимуллина Татарстан хакимияте органнарының моңа кадәр өч социаль челтәрдә эшләвен искәртә. Болар: «ВКонтакте», «Одноклассники» һәм Instagram* (Россиядә экстремистик дип танылган социаль челтәр).

Instagram* (Россиядә экстремистик дип танылган социаль челтәр) Америка компаниясенеке санала. Мәскәүнең Тверь суды ул компанияне экстремистик оешма дип тапты. Шуңа бәйле рәвештә, хакимият органнары әлеге мәйданчыкта үз аккаунтларын оператив рәвештә япкан. Шулай ук муниципаль берәмлекләр җитәкчеләре һәм башлыклары да үз сәхифәләрен бетергән.

Хәкимуллина сүзләренә караганда, әлеге мәйданчыкта утыз өчләп җитәкче булган. «Алар да үз аккаунтларын япты һәм бүтән анда эшләми. Роскомнадзор әлеге челтәрне экстремистик дип тапканда, VPN яки башка җайланмалардан файдаланып, хакимият үз фикерләрен шунда чыгарса һәм трансляцияләсә, сәер булыр иде. Бу карар аңлашыла да», — дип билгеләп үтте агентлыкның әңгәмәдәше.

Хәзер хакимият органнары һәм муниципалитет вәкилләре Россия мәйданчыкларына өстенлек бирә . Мәсәлән, «Одноклассники» һәм «ВКонтакте», шулай ук «Яндекс.Дзен» һәм «Яппи» шундыйлардан.