Россиянең басма гаммәви мәгълүмат чаралары 500,5 миллион сум күләмендә ярдәм алачак

Быел Россиядә басма гаммәви мәгълүмат чараларына ярдәм йөзеннән 500,5 миллион сум акча юнәлдереләчәк. РФ Цифрлы үсеш, элемтә һәм массакүләм коммуникацияләр министрлыгының телеграм-каналында шул хакта хәбәр ителә.

«95 федераль газета һәм журнал 95 миллион сум күләмендә дәүләт ярдәме алачак», - диелә хәбәрдә.

784 төбәк басма мәгълүмат чарасына 405,5 миллион сум күләмендә субсидия биреләчәк. Дәүләт ярдәме алачак басмалар арасында Россиядә яшәүче халыкларның милли телләрендәге гаммәви мәгълүмат чаралары, балалар һәм яшьләр өчен нәшер ителә торган газета-журналлар, шулай ук пенсионерлар һәм ветераннар өчен чыга торган басмалар, әдәби-нәфис, фәнни-популяр, мәдәни-агарту журналлары бар.