«Татар-информ» – Татарстанда иң еш сылтама ясала торган массакүләм мәгълүмат чарасы
«Татар-информ» мәгълүмат агентлыгы 2021 ел йомгаклары буенча Татарстанда мәгълүматы иң еш күчереп бастырыла торган массакүләм мәгълүмат чарасы булып танылды. Бу хакта «Медиалогия» компаниясе хәбәр итте. Агентлык материалларына сылтама ясау индексы 1 441,75 пунктны тәшкил итә.
Агентлыктан тыш бу исемлеккә «Татмедиа»га карый торган тагын 6 массакүләм мәгълүмат чарасы кергән. Алар арасында «Татарстан-24» телеканалы (4 урын), «Челнинские известия» газетасы (5 урын), «Казанские ведомости» газетасы, ул беренче унлыкка керде (10 урын), Sntat.ru (17 урын), «НТР — Түбән Кама» телекомпаниясе (20 урын).
Рейтинг «Медиалогия» системасы базасында булган 74 меңнән артык мәгълүмат чыганагы – ТВ, радио, газеталар, журналлар, мәгълүмат агентлыклары, Интернет-ММЧ арасында төзелгән. Рейтингка йомгак ясаганда хәбәрләр агрегаторлары, махсуслаштырылган массакүләм мәгълүмат чаралары исәпкә алынмаган.
«Татар-информ» мәгълүмат агентлыгы 2021 елның беренче һәм өченче квартал йомгаклары буенча беренче урынга чыккан.