Телләрнең күптөрлелеген саклап калуга багышланган «Төп сүз» гомумроссия иҗтимагый премиясенә гаризалар кабул итә

Телләрнең күптөрлелеген саклап калуга багышланган «Төп сүз» 5 нче гомумроссия премиясенә гаризалар кабул ителә башлады. Бу – гамәлгә ашырылган иң яхшы проектлар конкурсы. Премия Россиянең Милләтләр эшләре буенча федераль агентлыгы тарафыннан 2017 елда гамәлгә куелган иде.  Аның төп максаты – илдә телләрнең күптөрлелеген саклап калуга ярдәм итү.

Конкурс 7 номинация буенча үткәрелә: «Иң яхшы мультимедия проекты», «Иң яхшы нәшерлек проекты», «Иң яхшы фәнни проект», «Иң яхшы социаль инициатива», «Азсанлы төп халыкларның телләрен саклап калу», «Аерым казанышлар өчен» һәм  махсус номинация «Социаль җаваплы бизнес».

Конкурста катнашу өчен  2020 – 2021 елларда гамәлгә ашырылган һәм элек Конкурска тәкъдим ителмәгән проектлар кабул ителә.

Гаризаларны агымдагы елның 1 ноябреннән 26 ноябренә кадәр slovo@fadn.gov.ru адресына җибәрергә кирәк. Эшләр Экспертлар советы тарафыннан каралачак, аның составына телләрнең күптөрлелеген өйрәнүче дөньякүләм танылган галимнәр, җәмәгать эшлеклеләре керә. Конкурс  иң яхшы проектларны бүләкләү белән тәмамланачак.

 «Телләрнең күптөрлелеге илебез өчен дә, гомумән, бөтен дөнья өчен әһәмиятле. «Төп сүз» премиясе Россиянең барлык халыклары телләрен саклап калуга һәм үстерүгә ярдәм итәчәк», – дип билгеләп үтте Россиянең Милләтләр эшләре буенча федераль агентлыгы җитәкчесе Игорь Баринов.

Конкурсның Нигезләмәсе һәм гариза белән  http://fadn.gov.ru. сылтамасы буенча танышырга мөмкин.