«Татар-информ» мәгълүмат агентлыгында "Әфганстан һәм Татарстан арасында икътисадый, сәяси, мәдәни багланышлар" темасына матбугат конференциясе булачак
27 октябрьдә, 09.30 да «Татар-информ» мәгълүмат агентлыгында "Әфганстан һәм Татарстан арасында икътисадый, сәяси, мәдәни багланышлар" темасына матбугат конференциясе булачак.
Чарада мөселманнарның патриотик хәйрия фонды генераль директоры Рөстәм Хәбибуллин, Россия сәясәтчеләр җәмгыятенең аналитик үзәге җитәкчесе, Әфган сәясәтен өйрәнү үзәге җитәкчесе Андрей Серенко (Мәскәү) (онлайн), Әфганстан мөселманнары патриотик хәйрия фонды вәкиллеге директоры Мөхәммәд Йосыф Шинвари (онлайн), әфган-татар мәдәни фонды башлыгы Зәбихулла Надри Татар (онлайн), балаларны һәм хатын-кызларны яклау комитеты башлыгы Наджил Татар (онлайн) һәм фондның яшьләр комитеты башлыгы Ходжатулла Надери (онлайн) катнашачак.
Әфганстан татарларының тарихы Казан татарларына барып тоташа. Унсигезенче-унтугызынчы гасыр вакыйгалары турында фарсы телендә алып барылган абруйлы Әфган елъязмасы «Сираҗҗ ат-Таварих»та (1912) татарлар турында берничә тапкыр телгә алына. Балх, Бадахшан провинцияләренең бәйсез татарлар яшәгән өлкә булуы хакында да әйтелә. Шулай ук Tatar Beg, Hajji Malik Tatar Mazari, Mir Darwish Beg Tatar исемнәре телгә алына. Татар халкының Әфган якларына барып урнашуы берничә тапкыр күзәтелгән. Бу эмиграциянең сәбәпләре арасында Чыңгызхан чорына, Көнчыгыш Азияне Урта диңгез белән тоташтыручы Бөек Ефәк юлына бәйле вакыйгалар, шулай ук Кытай белән Һиндстанга товарлар ташучы сәүдәгәрләр, 1917 елгы революциядән качып киткән хәлле татарлар бар. Хәзерге вакытта Әфганстанда, нигездә Төньяк провинцияләрдә, 500 меңгә якын татар яши. Вакытлар узу белән биредәге татар теле җирле сөйләм белән катнашып, зур үзгәрешләр кичергән. Илдә татар теле юк дәрәҗәсендә. Бер ел элек аксакаллар җәмгыятенең мөрәҗәгате белән Бөтендөнья татар конгрессы Башкарма комитеты татар теле буенча онлайн дәресләр үткәрә башлады, бу дәресләр татар җәмгыяте вәкилләре арасында зур популярлык казанды.
«Татар – информ» мәгълүмат агентлыгында булачак матбугат конференциясе хәзерге вакытта Әфганстан татарларының тормышына, Төньяк провинцияләрдәге хәлләргә, РФ территориясендә тыелган «Талибан» оешмасы хакимиятне яулап алганнан соң хатын-кызларның хәленә, аларга ярдәм оештыруга, һ.б багышланачак. Сорауларны 89270379110 номерына җибәрергә мөмкин.
«Татар-информ» мәгълүмат агентлыгы сайтында матбугат конференциясенең онлайн-трансляциясе оештырылачак.
Массакүләм мәгълүмат чаралары вәкилләре һәм барлык теләүчеләр үзләренең сорауларын WhatsApp мессенджерында +7 (927) 037-91-10 номерына һәм pr@tatar-inform.ru электрон адресына алдан җибәрә алалар. Шулай ук теләүчеләр сорауларын онлайн-видеога шәрехләүләрдә бирә ала. ММЧ күрсәтү сорала.
ММЧ аккредитацияләү түбәндәге электрон почта аша уза: pr@tatar-inform.ru