«Мин вакцинация ясаттым»: Казанда социаль акция башлана

2021 елның 10 сентябре, җомга

11 сентябрьдә Россиянең биш эре шәһәрендә "Мир" телерадиокомпаниясенең "Мин вакцинация ясаттым" масштаблы акциясе  башлана. Социаль акция СОVID-19 авыруыннан вакцинация ясату зарурлыгына игътибарны җәлеп итүгә һәм вакцинация ясатуга уңай мөнәсәбәт булдыруга юнәлдерелгән. Ике көн дәвамында Красноярск, Новосибирск, Казан, Чиләбе һәм Пермьдә волонтерлар бу җаваплы адымны инде ясаган яки ясарга җыенган барлык кешеләргә бүләкләр таратачак. Акция Красноярск крае, Татарстан Республикасы, Новосибирск, Чиләбе һәм Пермь өлкәләренең сәламәтлек саклау органнары ярдәмендә уза.  

Акциядә катнашучы шәһәрләрнең һәрберсендә иң популяр сәүдә үзәкләрендә урнашкан вакцинация ясау пунктлары янында "Мин вакцинация ясаттым"  дип язылган стойкалар барлыкка киләчәк. Киләчәк ялларда Красноярск, Новосибирск, Казан, Чиләбе һәм Пермь халкы һәм кунаклары прививка ясатып кына калмыйча, үз сәламәтлегенә һәм тирә-юньдәгеләргә битараф булмаулары өчен аерымлык билгесенә ия булачак. Акцияне оештыручылар халыкка таратылачак якты беләзекләрнең һәм ябыштыргычларның ГТО значогы сыман стиль һәм горурлык элементына әйләнергә тиешлеген ассызыклый.

 "Мин вакцинация ясаттым" акциясе –  вакцинациягә уңай мөнәсәбәт булдыру өчен төбәкара дәрәҗәдә оештырылган беренче социаль проект. Аның ярдәмендә без бу җаваплы адымны ясаган яки ясарга җыенганнарның барысына да ярдәм итәргә телибез. Бу бигрәк тә көзге чорда мөһим, иммунитет көчсезләнә, ә авыру йоктыру куркынычы арта ", - дип билгеләп үтте "Мир" ТРК генераль продюсеры Павел Корчагин.

Акция 11-12 сентябрьдә дәвам итәчәк.

1. Казан - “МЕГА” сәүдә үзәге территориясендә вакцинация пункты, Җиңү проспекты, 141 йорт. Эш вакыты: 11-12 сентябрь, 11:00-19:00
2. Красноярск - "Роев ручей" паркы территориясендә вакцинация пункты, Свердловск ур., 293. Эш вакыты: 11-12 сентябрь, 11:00-19:00
3. Чиләбе - "Алмаз" сәүдә үзәге территориясендә вакцинация пункты, Копейское ш., 64. Эш вакыты: 11-12 сентябрь, 9:00-17:00
4. Новосибирск - "МЕГА" сәүдә үзәге территориясендә вакцинация пункты, Ватутин ур., 107. Эш вакыты: 11-12 сентябрь, 10:30-18:30
5. Пермь - “Планета” СКК, ш. Космонавтов, 162Б. Эш вакыты: 11-12 сентябрь, 11:00-19:00