Татарстанда хакимият органнарының халык белән турыдан-туры хезмәттәшлеге өчен Telegram-бот эшләтеп җибәрделәр
“Татмедиа” республика матбугат һәм массакүләм коммуникацияләр агентлыгы Татарстан Республикасы Регион идарә үзәге белән берлектә «Нәрсә булды?» Telegram-ботын эшләтеп җибәрделәр. Әлеге хезмәттән файдаланып, республика халкы һәлакәтләр, проблемалар турында хәбәр итә ала яки хакимият органнары һәм социаль объектлар эшен яхшырту турында үз тәкъдимнәрен җибәрә ала. Telegram-бот "Инцидент Менеджмент" системасына өстәмә буларак эшләячәк, әлеге система ярдәмендә Татарстан министрлыклары, ведомстволары һәм район администрацияләре социаль челтәрләрдә халык шикаятьләрен һәм мөрәҗәгатьләрен күзәтеп тора һәм аларга җавап бирә.
Хәзер Telegram-бот өч өлкәдә проблемалар турында мөрәҗәгатьләр кабул итә – "Мәдәният", "Сәламәтлек саклау", "Мәгариф". Аны https://t.me/incident_rt_bot яисә Telegram @incident_rt_bot сылтамасы буенча табарга була.
Бот, эшләтеп җибәргәннән соң, кулланучыга мөрәҗәгатен калдырырга теләгән өлкәне сайларга тәкъдим итәчәк. Проблеманы, вакыйганы бәян итүне яки эшне яхшыру турындагы тәкъдимне ирекле формада калдырырга мөмкин. Фотография беркетү мөмкинлеге бар. Telegram-бот кулланучыларга сорауны хәл итү нәтиҗәсендә җавап алу өчен телефон номеры белән бүлешергә тәкъдим итәчәк.
"Нәрсә булды?" боты аша алынган барлык хәбәрләр "Инцидент Менеджмент" системасына керә һәм җаваплы министрлыкларга эшкә җибәрелә. Мөрәҗәгать эшкәртелгәч, кулланучы профильле министрлыктан яки ведомстводан кире элемтә алачак.
"Инцидент Менеджмент" системасы Татарстанда 2018 елдан бирле эшли. Ул социаль челтәрләрдә проблемалар турындагы шикаятьләрне һәм сигналларны күзәтергә һәм аларга оператив җавап бирергә мөмкинлек бирә. 2021 елда "Инцидент Менеджмент" системасына халыктан 39 384 хәбәр кергән. Шулай ук Татарстанда 2012 елдан алып «Халык контроле» системасы эшли, аның ярдәмендә республика халкыннан проблемалар яки хокук бозулар турында хәбәрләр алына. Порталга атнасына уртача 4500 мөрәҗәгать килә. Иң популяр темалар – территорияләрне төзекләндерү, юлларны ремонтлау һәм карап тоту, пассажир транспорты эшчәнлеге .