Элеккеге матбугат министры Хамматов «ТАССР оешуга 100 ел» медале белән бүләкләнде
Татарстанның элеккеге матбугат министры Шамил Хамматов «Татарстан Автономияле Совет Социалистик Республикасы оешуга 100 ел» медале белән бүләкләнде. Аңа бүген 75 яшь тулды.
Татарстанның социаль-икътисади потенциалын ныгытуга сизелерлек өлеш керткәне һәм күпьеллык нәтиҗәле хезмәте өчен Шамил Хамматовны әлеге медаль белән бүләкләү турындагы указны ТР Президенты Рөстәм Миңнеханов имзалаган.
Медальне юбилярга «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев тапшырды.
Шамил Хамматов 1946 елның 27 августында Казанда туган, күп еллар «Советская Татария» газетасында эшләгән. 1986 елда — КПССның Татарстан Өлкә Комитеты пропаганда һәм агитация бүлегенең матбугат, радио һәм телевидение секторы мөдире, 1989 елда нәшриятлар, полиграфия һәм китап сәүдәсе эшләре буенча ТАССР Дәүләт комитеты рәисе итеп билгеләнгән.
1991-1992 елларда Хамматов Татарстан Республикасы мәгълүмат һәм матбугат министры булып эшләде, 1993-2011 елларда Татарстанның гаммәви мәгълүмат чараларында җитәкче вазифалар биләде.
Шамил Хамматов — Татарстан Республикасының атказанган мәдәният хезмәткәре, хезмәт ветераны.