Казанда «Алтын каләм – Золотое перо» XXVI республика балалар, яшүсмерләр һәм яшьләр матбугаты фестивале тәмамланды.
30 июльдә Казанда Россия Журналистлар берлеге быел беренче тапкыр covid-free форматында «Инфорум» укулары уздырачак. Укулар пандемия вакытында медиа һәм журналистлар эшчәнлегенә багышлана. «Инфорум»ның партнерлары: Татарстан Республикасы Журналистлар берлеге, «Татмедиа» Республика матбугат һәм массакүләм коммуникацияләр агентлыгы.
Белем бирү программасы басма һәм интернет массакүләм мәгълүмат чаралары вәкилләре, телевизион журналистлар һәм блогерлар өчен аерым төзелгән. Спикерлар – Россия Журналистлар берлеге рәисе Владимир Соловьев, БДТРК генераль директоры урынбасары – төбәк департаменты җитәкчесе Рифат Сабитов, РФ Иҗтимагый палатасының массакүләм мәгълүмат чараларының һәм массакүләм коммуникацияләрнең мәгълүмати бергәлеген арттыру комиссиясе рәисе беренче урынбасары Александр Малькевич, РБК агентлыгының берләштерелгән редакциясе җитәкчесе урынбасары Иван Макаров, «Россия – мөмкинлекләр иле» АКБОның төп проектлар департаменты җитәкчесе Оксана Ачкасова һәм башкалар.
«Бу – Татарстан Республикасы Журналистлар берлеге белән беренче уртак чара. Без җирле каләм ияләренә үз массакүләм мәгълүмат чараларын саклап калырга һәм аудиторияне арттырырга ярдәм итәчәк киңәшләр-ысуллар бирергә телибез», - диде Россия Журналистлар берлеге рәисе Владимир Соловьев.
Журналистлар пандемия шартларында ничек эшләргә, мультимедиа контентын булдырырга, Президент грантлары фондыннан проектларны финанслауга ирешергә, социаль челтәрләргә җәлеп итәргә һәм яшь хезмәткәрләрне мотивацияләргә өйрәнәчәк. Программаның практик өлеше TikTok челтәренә багышланачак. Кызыклы роликлар төшерү серләре хакында TikTok-продюсер Ренат Янбеков сөйләячәк һәм күрсәтәчәк. Катнашучылар аның белән бергә видео төшерәчәк. Иң яхшы ролик авторларын оештыручылардан бүләкләр көтә
«Инфорум» кысаларында беренче тапкыр «проектларны дегустацияләү» узачак. Бу – сайлап алынган проектларны идеяләрне тормышка ашыру өчен профессиональ ярдәм һәм киңәшләр алу максатыннан эксперт төркеменә тәкъдир итү.