Татарстан журналистлары #БЕЗБЕРГӘ халыкара премиясенә дәгъва кыла ала

Татарстан журналистлары #БЕЗБЕРГӘ халыкара премиясенә дәгъва кыла ала

#БЕЗБЕРГӘ халыкара премиясенә гаризалар кабул итү 25 июльгә кадәр озайтылды. Бу хакта республиканың яшьләр эшләре министры урынбасары Алла Кондратьева хәбәр итте.

Әлеге премия, «Доброволец России» бөтенроссия конкурсының дәвамы буларак, Россия Президенты ярдәме белән үткәрелә һәм илкүләм үсеш максатларына ирешүгә ярдәм итә. 10 ел эчендә конкурсның гомуми грант фонды 150 миллион сум тәшкил итте, ә аның лауреатлары яшьләр һәм иҗтимагый кадрлар резервына кертелде.

Массакүләм мәгълүмат чаралары өчен аерым юнәлеш – «Медиа» булдырылды, алар «Медиаволонтерлык», «Локаль медиа», «Сторителлинг», «Жюриның махсус номинациясе» дигән дүрт номинациядә катнашырга мөмкин.

2000гә якын гариза бирелгән инде, ләкин бары тик 15 катнашучы гына җиңүче булачак. Алар лидерлар һәм идарәчеләр әзерли торган «Сенеж» идарә остаханәсендә белем алачак, Герман Греф, Владимир Машков, Валентина Матвиенко һәм башкалар белән очрашулар көтелә. Җиңүчеләр шулай ук федераль каналларда, радиостанцияләрдә һәм «Газпром-Медиа холдинг» һәм «Рус медиагруппасы» матбугат басмаларында эшкә урнашу мөмкинлеге белән стажировка узачак. Моннан тыш, аларны Россия буйлап сәяхәт көтә.

Җиңүчеләрне 15 октябрьдән 5 ноябрьгә кадәр тавыш бирү юлы белән халык һәм жюри әгъзалары билгеләячәк. Җиңүчеләргә бүләкләрне Владимир Путин тапшырачак.