"Волжские зори» газетасы «У войны не женское лицо» республика конкурсында җиңүче булды

Татарстан Республикасы Кама Тамагы муниципаль районының «Волжские зори» газетасы редакциясе массакүләм мәгълүмат чараларында махсус чыгарылышларның республика конкурсында  җиңү яулады. Конкурс «У войны не женское лицо» гуманитар-социаль юнәлештәге махсус проект буенча уздырылды. Конкурска барлыгы 450 эш керде.

"Проектны гамәлгә ашыру барышында массакүләм мәгълүмат чараларында Бөек Ватан сугышында катнашкан хатын- кызларга багышланган материаллар күп булды. Тикмәгә генә «Татмедиа» агентлыгы массакүләм мәгълүмат чараларында иң яхшы махсус чыгарылышка Бөек Ватан сугышында катнашкан хатын- кызларга багышланган конкурс игълан итмәде. Җиңүчеләр үз басмасында сугышта катнашкан гүзәл затларыбыз образларын тулырак, яхшырак, кызыклырак, яктырак итеп күрсәтте», – диде Татарстан Республикасы  Дәүләт Советы Рәисе урынбасары, «Мәрхәмәт  – Милосердие» хатын-кыз депутатлар берләшмәсе җитәкчесе Татьяна Ларионова.

Конкурста икенче урынны «Кайбыч таңнары» һәм «Әтнә таңы»газеталары редакцияләре яулады. Ә өченче урынны Югары Ослан районының «Волжская новь», Мөслим районының «Авыл утлары» газетасы һәм «Сөембикә» журналы редакцияләре бүлеште.

Бүген Лаеш районында «Мәрхәмәт–Милосердие» хатын-кыз депутатлар берләшмәсенең «У войны не женское лицо» гуманитар-социаль юнәлештәге махсус проектның  икенче этабын гамәлгә ашыру мәсьәләсе буенча күчмә утырышы узды. Анда Татарстан Республикасының Архив эше буенча дәүләт комитетына массакүләм мәгълүмат чараларының Бөек Ватан сугышы елларында тыл хезмәтчәннәренең батырлыкларына багышланган махсус чыгарылышлары басылган саннарын тапшыру тантанасы булды.