Борис Титов Татарстанны эшкуарлар белән хезмәттәшлек итүдә һәм массакүләм мәгълүмат чараларында бизнес проблемаларын яктыртуда лидер дип атады
Мәскәүдә эшкуарлар хокукларын яклау буенча вәкаләтле вәкилләрнең XV бөтенроссия конференциясе тәмамланды. РФ бизнес-омбудсмены Борис Титов, конференция эшенә йомгак ясап, Татарстанны эшкуарлар белән хезмәттәшлек итүдә һәм массакүләм мәгълүмат чараларында бизнес проблемаларын яктыртуда лидер дип атады. Актив эшчәнлек өчен бүләкне ул ТР Президенты ярдәмчесе Фәрит Габделганиевкә тапшырды.
«Регионнардагы вәкаләтле вәкилләрнең эшчәнлеге мәгълүмати яктан тулысынча ачыклык таләп итә», - дип билгеләп үтте Борис Титов.
«Федераль, республика һәм җирле массакүләм мәгълүмат чараларында эшкуарларны кызыксындыра торган иң җитди мәсьәләләр хакында гына түгел, аларны хәл итү юллары турында да мәгълүмат басылып чыга», - диде ТР бизнес-омбудсмены Фәрит Габделганиев.
Бүләкне алганда ул, Татарстанда эшлекле климат булдыру өлкәсендә республика Президенты Рөстәм Миңнеханов йөкләмәсе буенча системалы эш алып барылуы турында сөйләде. «Узган ел Вәкаләтле вәкил адресына килгән мөрәҗәгатьләрнең күп булуы Татарстан эшкуарларының пандемия чорындагы проблемалары турында гына түгел, бизнес-бергәлекнең республика хакимиятенә ышанычы турында да сөйли. Мөрәҗәгать итүчеләрнең 70 процентының хокукларын торгызырга булыштык, калганнарына киңәшләр белән ярдәм иттек», - диде Габделганиев.