Бөек Ватан сугышында хатын-кызларның батырлыгы турында ММЧда иң яхшы махсус проект бәйгесе башланды
Республика матбугат һәм массакүләм коммуникацияләр агентлыгы «У войны не женское лицо…» социаль-гуманитар проекты кысаларында 1941-1945 еллардагы Бөек Ватан сугышы чорында хатын-кызларның батырлыгына багышланган махсус чыгарылышлар арасында конкурс игълан итә.
Конкурс Татарстан Республикасы Дәүләт Советының «Мәрхәмәт-Милосердие» хатын-кыз депутатлар берләшмәсе белән берлектә уздырыла.
Конкурсның максаты – массакүләм мәгълүмат чараларын Бөек Ватан сугышында катнашкан, тылда хезмәт иткән хатын-кызларның һәм сугыш чоры балаларының фидакарьлеге турындагы ядкарьләрне саклап калуга бәйле тематиканы яктыртуга җәлеп итү.
Конкурста катнашырга теләүчеләр 2020 елның 1 февраленнән 2021 елның 30 апреленә кадәр массакүләм мәгълүмат чараларында дөнья күргән эшләрне тәкъдим итәргә тиеш.
Гаризалар 2021 елның 30 апреленә кадәр (30 апрельне дә кертеп), түбәндәге адрес буенча кабул ителә: Казан шәһәре, Декабристлар урамы, 2, 6 кат, 605 бүлмә, матбугат хезмәтләре һәм җәмәгатьчелек белән элемтәләр бүлеге, «Конкурс на лучший специальный выпуск в СМИ о подвигах женщин в период Великой Отечественной войны» тамгасы белән. Тел.: 8(843)570-31-04, e-mail: prtatmedia@mail.ru.