Рөстәм Миңнеханов «Шаян ТВ» балалар телеканалында булды

Бүген Татарстан Республикасы Президенты Рөстәм Миңнеханов «Шаян ТВ» телеканалында булды.

Телеканал бинасы Казанның Горький ур., 15 адресы буенча урнашкан. Искәртик, телеканал Татарстан Республикасы Президенты ярдәме белән 2018 елның 12 ноябреннән башлап тәүлек буе аерым телевизион канал буларак эшли. Бу татар телендә тәүлек буе эшли торган беренче балалар телеканалы.

«Шаян ТВ» миссиясе - туган телне, милли мәдәниятне популярлаштыру, балаларда татар телен өйрәнүгә кызыксыну уяту.

Рөстәм Миңнеханов телеканал җиһазлары белән танышты, аның яшь телетапшырулар алып баручылары белән аралашты. Татарстан Президентына телевизион блогерлар мәктәбе кабинетын, «Шаян ТВ» аппарат студиясен, «Шаян ТВ» проектларының төшерү мәйданчыгын күрсәттеләр.

«Шаян балалар» программасын алып баручылар Татарстан Президентыннан интервью алдылар – алар балачакта нинди мультфильмнар карарга яратканын сорадылар, башка сораулар бирделәр. Аралашу татар телендә барды.

Рөстәм Миңнехановны «Яңа гасыр» (ТНВ) телерадиокомпаниясе генераль директоры Илшат Әминов, "Татмедиа" Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев озата йөрде.