Айдар Сәлимгәрәев: «Китап» радиосы яңа татар шәһәр мәдәниятен формалаштырачак

2021 елның 22 гыйнвары, җомга

«Татмедиа» Республика матбугат һәм массакүләм коммуникацияләр агентлыгы җитәкчесе «Китап» радиосы яңа татар шәһәр мәдәниятен, мохитен формалаштырачак, дип саный.

«Китап» радиосының FM ешлыкта барлыкка килүе — зур хезмәт. Татарстан Президенты Рөстәм Миңнехановның да ярдәме зур булды. Әдәби радиостанция — татар теле, мәдәнияте үсешенең яңа юнәлеше. Радио гасырлар буена Казанда яшәгән татар зыялыларының терәк-таянычы да», — диде ул матбугат очрашуында.

Айдар Сәлимгәрәев «Китап» ның татар әдәбиятына ярдәме зур булыр дип саный. «Сер түгел, язучының иҗатын аудиториягә җиткерү авыр. Радиостанцияне булдыру халыкны арттырырга, тыңлаучы һәм иҗади кешеләр арасындагы араны якынайтырга мөмкинлек бирәчәк. Без үзара хезмәттәшлекнең төрле форматларын үстерәчәкбез», — диде ул.

«Хәзер ешлыклар күп түгел. Халык татар җырларына, татар әсәрләренә мохтаҗ. „Китап“ радиосын Яр Чаллыда да FM ешлыгында ачарга җыенабыз», — диде Айдар Сәлимгәрәев. 

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International