Рамил Гали Татарстан Фотографлар берлеге рәисе итеп сайланды
«Татар-информ» мәгълүмат агентлыгы фотохәбәрчесе Рамил Гали Татарстан Республикасы Фотографлар берлеге рәисе итеп билгеләнде. Бу хакта агентлыкка үз чыганакларыннан билгеле булды.
Танылган фоторәссам Татарстан гаммәви мәгълүмат чараларында 1985 елдан бирле эшли. Ул «Вечерняя Казань», «Татарстан яшьләре» һәм «Шәһри Казан» газеталарының фотохәбәрчесе була. 2000 елда «Комсомольская правда» газетасы чакыруы буенча Мәскәүгә күчеп китә, алга таба «Коммерсантъ» нәшрият йорты һәм «Гудок» газетасы белән хезмәттәшлек итә. 2009-2010 елларда Нью-Йоркта Tourism журналында эшли. Мәскәүгә әйләнеп кайтканнан соң, «Труд» газетасының фотохәбәрчесе була.
2015 елда Рамил Гали Казанга кайта. Башта ул «Комсомольская правда» газетасында хезмәт итә, ә 2016 елдан «Татар-информ» агентлыгында фотохәбәрче булып эшли.