Виктор Демидов: кешеләрнең социаль хәле журналистларның эшенә бәйле
Массакүләм мәгълүмат чаралары – хәзерге җәмгыятьне үстерүче төп факторларының берсе, ул дәүләт һәм гражданнар арасында элемтәне җайга салырга мөмкинлек бирә. Бу хакта республиканың әйдәп баручы ММЧ җитәкчеләре белән очрашуда ТР буенча баш федераль инспектор Виктор Демидов сөйләде.
Әңгәмә барышында ул баш федераль инспекторлар институты 2000 еллар башында Россия Президенты йөкләмәләренең үтәлешен нәтиҗәле контрольдә тоту өчен оештырылган булуын искә төшереп үтте.
Институтның мөһим бурычы — илнең барлык төбәкләрендә дәүләт программаларын, беренче чиратта – илкүләм проектларны тормышка ашыруны мониторинглау. Шулай ук субъектлар халкы белән актив хезмәттәшлек алып барыла, республикада бу эш Россия Федерациясе Президентының Татарстандагы кабул итү бүлмәсе аша алып барыла.
"2020 елның беренче яртыеллыгында кабул итү бүлмәсенә 503 мөрәҗәгать керде. Кешеләрне барыннан да бигрәк социаль өлкә (мөрәҗәгатьләрнең 29% тан артыгы), оборона һәм куркынычсызлык темалары (27,2%), торак-коммуналь хуҗалык өлкәсе (16,2%) һәм икътисад (17%) кызыксындыра», — дип белдерде Виктор Демидов.
Гражданнар белән хезмәттәшлек турында сөйләгәндә, ул бу эштә массакүләм мәгълүмат чаралары уйнаган югары рольне ассызыклады. Аның сүзләренә караганда, бүгенге көндә бу – хәзерге җәмгыять үсешенең төп факторларының берсе.
"Гражданнарның социаль хәле сезнең һөнәри эшегезгә бәйле. Сез кешеләргә вакыйгалар, шул исәптән дәүләт хакимияте органнары, иҗтимагый берләшмәләр һәм партияләр эше турында даими мәгълүмат җиткерү бурычын үтисез», — дип билгеләп үтте Татарстан Республикасы буенча баш федераль инспектор.
Ул Татарстанның дистәләгән инновацион проектларны уңышлы тормышка ашыручы төбәк булуын билгеләп үтте. Бу республикага гражданнарның социаль-икътисади үсеше һәм иминлеге буенча илдә алдынгы позициядә булырга мөмкинлек бирә. Боларның барысы да субъект җитәкчелегенең җайга салынган һәм нәтиҗәле эше нәтиҗәсендә гамәлгә ашырыла.
"Татарстан үз территориясендә дәүләт программаларын һәм милли проектларны актив гамәлгә ашыра, аларның төп максаты — кешеләрнең тормыш дәрәҗәсен арттыру", — дип йомгаклады Виктор Демидов.