Казанда Флорид Әгъзамовның тууына 80 ел тулуга багышланган чаралар уздырыла

11 февральдә Казан дәүләт университетының журналистика факультеты беренче деканы, педагог, бүген гаммәви мәгълүмат чараларында көч куючы күп кенә журналистларның остазы булган Флорид Әгъзамовның (1936-2005) тууына 80 ел тулуга багышланган чаралар уздырыла.

Аерым алганда, бу көнне “Мәдәниятләр диалогы контекстында мәгълүмати киңлекне гуманлаштыру” дигән фәнни-гамәли конференция үткәрү күздә тотыла. Аның пленар өлеше 9.30дан 11.30га кадәр Н.И.Лобачевский исемендәге фәнни китапханәнең конференц-залында (Казан ш., Кремль ур., 35) була. Секция утырышлары исә КФУның Социаль-фәлсәфи фәннәр һәм гаммәви коммуникация институты бинасы аудиторияләрендә (Казан ш., Нужин урамы, 1/37) көндезге 12дә башлана.

Шул ук көнне 15.00дә “Ногай” кунакханәсендәге “Тукай” конференц-залында (Бауман урамы, 19, 5нче кат) Флорид Әгъзамовны искә алу кичәсе уздырыла.

Чаралар КФУ, ТР Журналистлар берлеге һәм “Татмедиа” АҖ тарафыннан оештырыла, дип хәбәр иттеләр уку йортының Социаль-фәлсәфи фәннәр һәм гаммәви коммуникация институты татар журналистикасы кафедрасыннан.