Уникаль медиахолдингка - 8 ел

«ТАТМЕДИА» АҖ — Татарстан Республикасының зур төбәк медиа компаниясе. Бүген – 1 октябрь көнне дистәләгән матбугат чарасын берләштергән уникаль оешма барлыкка килүгә 8 ел булды. 2006 елда муниципалитетлар федераль закон тарафыннан массакүләм матбугат чараларын гамәлгә куюда чикләнә. Нәтиҗәдә, республикабызда дөнья күргән бер төркем басмаларның хокукый формасы буенча сораулар туа. Татарстанда бу мәсьәләне хәл итүгә бик җитди карыйлар. Шул рәвешле 2007 елның 1 октябрендә Татарстан Президенты указы белән “Татмедиа” акционерлык җәмгыяте оеша. Аның составына элеккеге мунициапаль һәм дәүләт матбугат чаралары керә. - “Татмедиа” командасы алдына куелган бурыч булып ул чорда социаль-мөһим проектларны тормышка ашыру, шәһәр һәм муниципаль басмаларны, телерадиокомпанияләрнең эшен оештыруның яңа формаларын табу торды. Бу формалар максималь дәрәҗәдә базар шартларына туры килергә тиеш иде. Турыдан-туры субсидияләүгә бәйле булмыйча, көндәшлек мохитенә аяк басу һәм республика медиамәйданында җитди урын яулау мөһим иде, - дип искә ала “Татмедиа” АҖ генераль директоры Фәрит Шәһиәхмәтов. Аның сүзләренчә, шул рәвешле безнең матбугат чараларын саклап кала алганнар һәм аларның үсешенә яңа импульс бирелгән. Берләштерү хисабына чыгымнар шактый кимегән, аннары керемнәрне дә арттыру мөмкинлеге туган. - Безнең төп максатыбыз – сыйфатлы контент җитештерү. Куелган бурычларны үтәп, без халыкка иҗтимагый-сәяси, мөһим, объектив һәм сыйфатлы мәгълүматны җиткерүгә ирешә алдык. Бу “Татмедиа” компаниясенең төп миссиясе, - ди генераль директор. Республикабызда хәзерге вакытта барлыгы 1043 массакүләм матбугат чарасы исәпләнә, шуларның 223е “Татмедиа” холдингына керә - 98 газета, 16 журнал басыла, 21 телекомпания һәм 13 радиостанция эшли. Барлыгы холдингта 84 филиал исәпләнә. Республика, шәһәр, район газеталары, журналлары, интернет басмалары рус, татар, удмурт, чуаш телләрендә гамәлгә куела. “Татмедиа” АҖ бүген дә бер урында тормый, үсешкә-үзгәрешкә омтыла. Алга таба юнәлешләрне билгеләп, 2017 елга кадәр “Татмедиа” үсеш стратегиясе булдырылган. Өч еллык программада дүрт төп юнәлеш билгеләнгән - аудиторияне арттыру, дәүләт заказын үтәүне яхшырту, монетизацияне арттыру, шулай ук эчке ресурсларны нәтиҗәле файдалану өстенлекле мәсьәләләр рәтендә.