“Салават күпере” Өлкәннәр көнен бәйрәм итә

Бүген “Салават күпере” редакциясендә бәйрәм. Журнал нәни дусларын җыйды. Дөресрәге “Олыларны олылыйк!” дигән бәйгегә нәтиҗәләр ясалды. Җиңүче укучыларга истәлекле бүләкләр, мактау сүзләре ирештерделәр. “Салават күпере” - нәниләр басмасы. Бәйрәм уңаеннан алар “Кулдан-кулга, йөрәктән – йөрәккә” дигән хәйрия акциясе оештырган. - Бүген бөтен дөньяда бәйрәм. Өлкәннәр көнен билгеләп узабыз. Шул хөрмәттән без июнь санында ук: “Балалар, әйдәгез бу көнгә алдан ук әзерләнәбез” дип тәкъдим иттек һәм нәни дусларыбызга олылар өчен үз куллары белән иҗат иткән әйберләргә бәйге игълан иттек. Безгә Татарстанның төрле районнарыннан йөздән артык кул эше килде. Араларыннан иң яхшыларын сайлап алдык. Ә бүген әлеге хезмәтләрнең авторларын әниләре белән бергә үзебезгә чакырдык. Мондый очрашулар балаларны киләчәктә дә иҗатка тартылырга, матурлыкны тоярга өндиячәгенә ышанабыз, - ди журналның баш мөхәррире Зилә Хөснетдинова. Журналга кунакка бүген җиде бала килгән. Казаннан Әлфия Кәримова, Таисия Морозова, Юныс Салихов, Балтачтан Гайшә һәм Гомәр Камалиевлар, Кукмарадан Мәрьям Шәһабиева редакциянең махсус бүләкләренә ия булды. Ун яшьлек Зөлхиҗә Салихова исә төп җиңүче итеп табылды. Конкурска ул дәү әнисе белән бергәләп бизәгән тәлинкә һәм кулдан эшләнгән хуш исле сабыннар җибәргән булган.