Айрат Зарипов булачак журналистлар белән очрашты

Республика матбугат һәм массакүләм коммуникацияләр агентлыгы җитәкчесе Айрат Зарипов бүген КФУның Массакүләм коммуникацияләр һәм социаль фәннәр институтының журналистика бүлегендә белем алучы югары курс студентлары белән очрашты. Бер сәгатьлек очрашу барышында агентлык җитәкчесе үзе һәм Татарстандагы гаммәви мәгълүмат чаралары турында сөйләде. Соңыннан студентларның сорауларына җавап бирде. Булачак журналистларны, барыннан да бигрәк, Татарстанда милли журналистиканың язмышы кызыксындырды. Айрат Зарипов фикеренчә, милли гаммәви мәгълүмат чараларына ярдәм итәргә кирәк. Очрашуда яшьләр матбугаты булдыру, укыту программаларына бәйле сораулар һәм башка мәсьәләләр дә күтәрелде.