Спорт киносы һәм телевидениесе чемпионатының Казанда 33нче дөньякүләм финалы башлана

Казан үзен Россиянең спорт башкаласы гына түгел, быел спорт киносы һәм телевидениесе башкаласы ролендә дә сынап карый. 5-10 августта Татарстан Республикасы башкаласында “FICTS Challenge – 2015” спорт киносы һәм телевидениесе чемпионатының 33 нче дөньякүләм финалы үткәрелә. Италиянең Милан каласында уздырылып килгән финал, беренче тапкыр буларак, Апеннины ярымутравы чикләреннән чыга. Аерым алганда, финалга Россия, Әзербайҗан, Ирак, Төркия, Италия, Бөекбритания, АКШ һәм башка – җәмгысе 31 илдән 100 хезмәт халыкара жюри тарафыннан сайлап алынган, ә Россиянең үзеннән 25 картина финалга чыккан, шул исәптән Татарстан кинематографистларының 6 иҗат җимеше дә. Конкурстан тыш программага исә 20 фильм кертелгән. Фильмнар нинди телдә төшерелгән булса, ә арада татар телендәге хезмәтләр дә бар, - шушы телдә күрсәтелә, ләкин рус теленә субтитрлар белән. Кинода спорт темасы гадәти булмаганга, тамашачы өчен бу кызыклы булыр дип көтелә. Шул рәвешле, 38 секундтан 128 минутка кадәр дәвамлыктагы кино сәнгате үрнәкләренең шушы 100е 9 номинация буенча бәяләнә ”Олимпия уеннары – Олимпия рухы”, “Документаль кино”, “Уен киносы”, “Трансляцияләр һәм яңа технологияләр”, “Спорт һәм җәмгыять”, “Спорт һәм реклама”, “Кино һәм ТВ футбол”, 2 өстәмә – “Спорт анимациясе”, “Спорт һәм шәхес” һәм Гран-при иясе ачыклана. Номинацияләрнең ярдәмче номинацияләре булуын да исәпкә алганда, сүз барышында 40тан артык приз каралуы ачыкланды, шул исәптән ТР Хөкүмәте, кайбер министрлыклары әзерләгәннәре дә була. Жюри рәисе исә – Россия сценаристы, “Чистая победа” фильмы режиссеры Георгий Шенгелия. Спорт киносы һәм телевидениесе форумының 33 нче дөньякүләм финалы Татарстанның үзенчәлекле урынында - Зөя (Свияжск) утрау-шәһәрлегендә ачык һавада 6 августта тантаналы төстә ачыла. Анда спорт һәм кино йолдызлары катнашуы көтелә. Шулай ук танылган режиссерлар һәм сценаристлар катнашында мастер-класслар, түгәрәк өстәлләр дөньякүләм финал кысаларында үткәрү күздә тотыла. Конкурска алынган хезмәтләр исә “3D PORT Cinema” кинотеатрында ("Ривьера" комплексы) бушлай күрсәтелә (4 кинозалда көненә 5әр-6 шар сеанс). Шулай ук FINA паркында (ул Спортның судагы төрләре сарае белән "Казан Арена" стадионы арасында урнаша) киң экраннан ачык һавада бушлай карап була. Кайсы картина кайчан күрсәтеләсе турында төгәл мәгълүмат, билет алуга заявкалар чемпионатның рәсми сайтында, вконтакте, инстаграм социаль челтәрләрдәге битләрендә урын ала, дип вәгъдәли оештыручылар исеменнән бүгенге сөйләшүдә катнашучылар. Чараның рәсми хэштегы #FICTSKAZAN2015 FICTS Challenge – 2015” спорт киносы һәм телевидениесе чемпионатының 33 нче дөньякүләм финалын ябу тантанасы 9 августка билгеләнгән. 34 нче дөньякүләм финалның исә Казанда булуы икеле, бу мөмкинлекне Санкт-Петербургка бирү ихтималы зур.