Казан Кремлендә Татарстанның сәнгать әһелләре-фронтовиклар турында китап тәкъдим ителә

30-нчы июльдә Казан Кремленең “Манеж” күргәзмә залында “Мәңгелек кешеләр. Фронтовиклар – Татарстанның сәнгать әһелләре: портретлар һәм язмышлар” китабын тәкъдим итү була. Татарстан китап нәшрияты тарафыннан 2100 данәдә чыгарылган китапка республиканың дүрт дистәдән артык язучысы, рәссамы, артисты, композиторы кергән. Алар арасында Муса Җәлил, Гадел Кутуй, Фәридә Яруллина, Харис Якупов, Фатих Кәрим, Афзал Шамов, Байназар Альменов, Геннадий Паушкин да бар. Әлеге шәхесләр Ватанны үзләренең хезмәтләре белән генә түгел, кулларына корал тотып та яклаганнар. Китапка гаилә архивларыннан алынган сирәк материаллар кергән, автор-төзүче – Альбина Әпсәләмова. Китапны тәкъдим итү 15.00 сәгатьтә башлана, дип хәбәр итә оештыручылар.