«Шәһри Казан» укучылары арасындагы «25 еллыкка – 25 капчык шикәр комы» бәйгесе нәтиҗәләре

«Шәһри Казан» газетага язылучылар арасында игълан иткән «25 еллыкка – 25 капчык шикәр комы» конкурсына кайнатмалар рецепты белән бергә әнә шундый җылы эчтәлектәге хатлар да килде. Бәйгенең шарты буенча, редакциягә газетага язылу квитанциясе белән берәр үзенчәлек­ле кайнатма рецепты җибәрергә кирәк иде. Килгән хатларны өстәл өстенә җәеп салгач, аларның берсеннән груша, икенчесеннән кура җиләге исен тойдык дисәк тә, ялган булмас. Кайбер укучыларыбыз рецептларын шул тиклем җентекләп-аңлатып язганнар ки, без үзебез дә алар белән бергә бакчадан җиләк җыеп, кайнатма әзерләгәндәй булдык. 

 

«Шәһри Казан»ны беренче көннәреннән үк алабыз, укыйбыз. Рәхмәтләребезне әйтәбез. Газетабызны саклап калу – аны яздырып алудан да тора. Быел редакция абунәчеләрне җәлеп итүнең тагын бер ысулын файдаланган. Бик дөрес эшләгәнсез, Алланың рәхмәте яусын. Сезгә бер үтенечем бар: әгәр рецептымны уңай бәяләсәгез, бүләгемне «Ярдәм» мәчетенә тапшырсагыз иде. Хәер-догаларымны җибәрәм, саулык-сәламәтлек теләп калам», – дип язган Мәдинә Абдулганиева. Сезнең исемнән шикәр комын мәчеткә илтеп тапшырырбыз, Мәдинә апа. 

 

Конкурста катнашучыларның һәркайсына да зур рәхмәтебезне белдерәбез. Иң үзенчәлекле кайнатма рецептлары белән (25ен дә сыйдыра алмадык, гафу итәрсез) бүгенге санда таныша аласыз. Җиңүчеләрне 100ләп хат арасыннан сайлап алдык. Рецептларны ничек сайладыгыз дигән сорау туар бәлки кайберләрегездә. Редакция хатын-кызлары утырдык та, оригиналь, әмма әзерләве бик катлаулы булмаган рецептларга тукталдык. Ә бүләк ияләренең редакция белән элемтәгә чыгуларын сорыйбыз. Телефоннарыбыз: (843)562-50-12, 8-917-851-69-62 (кәрәзле).