“РБК-Татарстан”га яңа баш мөхәррир билгеләнде

Күптән түгел “РБК-Татарстан” редакциясе баш мөхәррирсез калган иде. Бүген әлеге коллективка, ниһаять, яңа җитәкчене тәкъдим иттеләр. Баш мөхәррир итеп күпләргә билгеле булган Алмаз Миргаязов билгеләнде. Әйтергә кирәк, соңгы көнгә кадәр бу редакцияне кем җитәклиячәге турында мәгълүмат булмады. Алмаз Миргаязов журналистлар арасында гына билгеле кеше түгел. Аны шактый милләттәшләребез яхшы белә. Чөнки ул халык арасында популяр “Татар радиосы” радиостанциясенең директоры булып торды. Әлеге вазифада Миргаязов 10 ел эшләде. “Татар радиосы” директоры урыныннан ул 2015 ел башында китте. Ул вакытта Алмаз Миргаязов: “Монда эшләргә җитәр инде. Киләчәккә планнар әлегә юк, бераз ял итеп алам, аннары карармын. Берәр яңа әйбер эшләп карыйсы килә”, - дип белдергән иде.