“Мәгариф” журналы “Авыл укытучысы-2014” конкурсының җиңүчеләрен бүләкләде

2014 елның 7 октябре, сишәмбе
   500дән артык мөгаллим “Мәгариф” журналы оештырган “Авыл укытучысы” бәйгесендә катнашты. Конкурс таләпләре буенча сала укытучылары башта үз эсселарында яңа заман авыл укытучысы нинди булырга тиеш дигән сорауга җавап эзләделәр. Икенче турга сайлап алынган ун автор өчен интернетта тавыш бирү оештырылды. Оештыручылар тәкъдиме белән, ахыр чиктә, ун автор да соңгы – хәлиткеч этапка үткәрелде. Анысында катнашучылар жюри каршында мастер-класс тәкъдим итте. Жюриның бердәм фикере буенча “Авыл укытучысы-2014” бәйгесенең җиңүчесе дип Кукмара районының Ядегәр авылы Г.Г.Гарифуллин исемендәге урта гомуми белем бирү мәктәбенең югары квалификация категорияле тарих һәм җәмгыять белеме укытучысыРәмзия Бәшәрова танылды. Икенче урында – Алексеевск бистәсендәге 2нче урта мәктәпнең татар теле һәм әдәбияты укытучысы Илсөяр Җамалиева. Өченче урында – Азнакай районы Актүбә бистәсендәге 3нче урта мәктәпнең рус теле һәм әдәбияты укытучысы Лилия Шакиртянова. 
   Җиңүчеләрне котлау һәм бүләкләү тантанасы исә “Татмедиа” бинасында узды. Үзенең кереш сүзендә “Татмедиа” ширкәте генераль директоры Фәрит Шаһиәхмәтов белдергәнчә, ил күләмендә педагоглар өчен төрле бәйгеләр уза, ләкин укытучылар аларның барысына да эләгә дә, җиңә дә алмый. Мондый шартларда җирле, республика масштабында үтүче конкурслар мөһим роль башкара. “Авыл укытучысының дәрәҗәсен күтәрү юлында, төрле проблемаларны ачуда һәм чишүдә “Мәгариф” журналы оештырган конкурс дәвамлы булырга тиеш”, – дип искәртте ул һәм киләчәктә укытучыларны тагын да активрак катнашырга чакырды. 
   – “Мәгариф” журналы укытучылар тормышында актив катнашырга тиеш, чөнки журналыбыз безнең укытучыларның төп басмаларыннан санала, – дип башлады сүзен “Мәгариф” журналының баш мөхәррире Илдар Миргалимов. – XXI гасырда авыл шактый катлаулы чор кичерә. Шундый шартларда авыл укытучысына, авыл мәктәбенә бик зур җаваплылык төшә. Бик күп төрле миссияләр белән бергә, авыл мәктәбе әле үзенең шәһәр мәктәбеннән ким булмавын да раслап торырга тиеш. Шөкер, анда да яхшы белем бирелә, анда да менә дигән укытучылар эшли. Шушы конкурс белән без әлеге хакыйкатьне янә бер раслау максатын куйдык, максатыбызга ирештек дип уйлыйм”. 
   Бүләкләргә килгәндә, беренче һәм икенче урыннарны алучылар “Мелита-Сток” җәмгыяте биргән туннар белән бүләкләнде, өченче урын иясе “Татмедиа”дан I-Pad алды. 
   “Интертат” электрон газетасы
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Агентлык турында
Документлар
Матбугат хезмәте
Гражданнар мөрәҗәгате һәм гражданнарны кабул итү
Адрес: 420066 Казан шәһәре, Декабристлар урамы, 2
Телефон: +7 (843) 570-31-22, 570-31-01
Факс: +7 (843) 537-91-04
E-Mail: ra.tatmedia@tatar.ru
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International