"Татмедиа" Республика матбугат һәм массакүләм коммуникацияләр агентлыгы

V төбәк һәм милли ММЧ форумында катнашучылар “Татар-информ” мәгълүмат агентлыгында булдылар

2014 елның 19 июне, пәнҗешәмбе

Бүген Казанда V Төбәк һәм милли ММЧ форумы башланды, Татарстан башкаласына РФ нең 30 субъектыннан масс-медиа вәкилләре җыелды.
Бүген форумда катнашучылар Татарстан Республикасы массакүләм мәгълүмат чаралары тармагы белән таныша, шулай ук республиканың әйдәп баручы ММЧ офисларында була. Бүген форум делегатлары “Татар-информ” мәгълүмат агентлыгында булды. Мәгълүмат агентлыгының генераль директоры Леонид Толчинский кунакларга агентлык тарихы, аның структурасы, махсус проектлары, эш үзенчәлекләре турында сөйләде.
“Татар-информ” МА реаль вакыт режимында сәяси, икътисади, иҗтимагый, мәдәни, спорт темаларына уникаль мәгълүмат продуктлары булдыра. Күпчелек материаллар видео- һәм фотолар белән белән тулыландырылып тәкъдим ителә. Хәзер агентлык көн саен, тәүлегенә 24 сәгать, рус телендә 250 мәгълүмат (200гә якыны Татарстан тормышы турында), татар телендә уртача 40 үзенчәлекле материал җитештерә, дип сөйләде “Татар-информ” МА генераль директоры. Агентлыкның төп бурычы – мөмкин кадәр күбрәк кешегә төбәк тормышы турындагы мәгълүмат җиткерү, дип ассызыклады Леонид Толчинский.
“Татар-информ” ның РФдә һәм якын чит илләрдә рус телендә эшли торган хәбәрчеләр пункты челтәре, татарлар күпләп яши торган төбәкләрдә, Төркиядә татар телендә эшләүче үз хәбәрчеләре бар. “Татар-информ” эре татар диаспораларыннан мәгълүмат җыючы чит ил татарлары өчен яңалыкларның латинда тәкъдим итүче бердәнбер илкүләм агентлык булып тора.
“Татар-информ” МА гомумдөньяви тенденцияләр кысаларында эшләп, яңа сервислар, яңа мәгълүмати технологияләр кертә, дип билгеләп үтте Леонид Толчинский. “Ati-times”, “Пятница, с 13-го”, “Симфония новостей” һ.б. кебек махсус проектларга зур игътибар бирә. Агентлык хәбәрләре көн саен “Спорт FM” радиосында яңгырый.
Генераль директор урынбасары – рус телендәге мәгълүмат редакциясе баш мөхәррире Ләйсән Абдуллина мәгълүмат агентлыгында журналистның эш принциплары турында сөйләде һәм форумда катнашучыларның сорауларына җавап бирде. Кунаклар агентлыкның ньюсрумы белән танышты.

"Татар-информ" МА мәгълүматы буенча.

БАРЛЫК ЯҢАЛЫКЛАРНЫ УКУ