"Татмедиа" балаларга бәйрәм оештырды

“Татмедиа” бинасы янындагы парк бүген чын мәгънәсендә бәхетле балачак иленә әверелде. 
 Биредә “Салават күпере”, “Ялкын” һәм “Сабантуй” журналлары нәни дуслары өчен күңелле бәйрәм чарасы оештырган иде.

Балаларны яклау көнендә уздырылган бу гаҗәеп тамаша кечкенә малай-кызларга гына түгел, аларның әти-әниләренә дә күтәренке кәеф бүләк итте. Чөнки нарасыйларының кояштай балкыган күзләрен, йөзләреннән бер минутка да төшмәгән елмаюын күрү үзе бер бәхет бит! 

Бәйрәм рухы паркка килеп кергәнче үк сизелә иде. Ерактан яңгыраган музыка һәм шарлар белән бизәлгән мәйданга халык бәйрәм чарасы башланганчы ук агыла башлады. Балаларны яраткан мультфильм геройлары каршы алып, могҗизалар “кыры”на озатып торды.
 
Парк өч шартлы мәйданга бүленгән иде. Бәйрәмне оештыручы өч журнал үзенә билгеләнгән җирдә урнашып, төрле күңел ачу чаралары оештырды. Һәр бала-чага монда күңеленә хуш килердәй уен-шөгыль тапкандыр, мөгаен. Бәйрәмгә килүчеләр төрледән-төрле бәйгеләрдә катнаша, рәсем ясый, футбол уйнау, беләзек, муенсалар үрү буенча мастер-класслар карый, йөзләренә аквагрим ясата, батутта сикерә алды.

“Салават күпере”, “Сабантуй”, “Ялкын”ның һәркайсының үз аерым мәйданы булса да, өчесенең дә максатлары бер иде. Аларның нәни дусларына бәхетле мизгелләр бүләк итәргә тырышты.

“Татмедиа” ААҖ генераль директоры Фәрит Шәһиәхмәтов биредәге мәйданда бәйрәмнәрне елына бер тапкыр - Балалар яклау көнендә генә түгел, ешрак уздырырга кирәк дигән фикер белдерде. 

Бәйрәм вакытында чараны оештыручылар һәр теләгән кешене үз басмаларына да яздыртты. Соңыннан исә, алар арасында лотерея уйнатылды. Гомумән, бүген бәйге-уеннарда катнашкан бер генә нәни дә өенә бүләксез кайтмады.