Татарстанда “Үз мәктәбеңә ярдәм ит!” акциясе дәвам итә

2014 елның беренче дүрт аенда “Үз мәктәбеңә ярдәм ит!” акциясендә 250 спонсор катнашкан. Алар республиканың 29 районында урнашкан 157 гомумбелем бирү учреждениесенә ярдәм күрсәткән. Шул рәвешле, Әгерҗе, Азнакай, Аксубай, Актаныш, Әлмәт, Әтнә, Арча, Апас, Баулы, Балтач, Бөгелмә, Буа, Биектау, Алабуга, Яшел Үзән, Кайбыч, Кукмара, Лениногорск, Менделеевск, Минзәлә, Түбән Кама, Яңа Чишмә, Нурлат, Балык Бистәсе, Саба, Сарман, Чирмешән, Чистай, Ютазы районнары, Яр Чаллы һәм Казан шәһәре мәктәпләренә хәйрия ярдәменең гомуми күләме 5 миллион сумнан да артып киткән. 

Аеруча актив районнарга килгәндә исә, 2014 елның беренче кварталында Арча районында спонсорлык ярдәменең күләме 710 мең сумны тәшкил иткән. Казанда – 686 меңлек, Лениногорскида – 482,5 меңлек, Әтнә районында – 470 меңлек, Әлмәттә – 450 меңлек, ә Яр Чаллыда исә 407,5 мең сумлык ярдәм күрсәтелгән. Укучыларыбыз игътибарына үз мәктәпләренә аеруча зур ярдәм күрсәткән спонсорлар исемлеген дә тәкъдим итәбез. 

1. “Татнефть” компаниясенең генераль директоры Наил Маганов Әлмәт районының 1нче номерлы лицеена 450 мең сум биргән. 

2. “Татмедиа” матбугат һәм массакүләм коммуникацияләр агентлыгы җитәкчесе Ирек Миңнәхмәтов Арча районының 1нче номерлы урта белем бирү мәктәбенә 300 мең сумлык ярдәм күрсәткән. 

3. Әтнә районындагы Ленин исемендәге нәсел заводы рәисе Илгиз Хәйруллин Бәрәскә урта белем бирү мәктәбенә 250 мең сумлык ярдәм белән булышкан. 

4. Татарстанның төзелеш һәм архитектура буенча ведомстводан тыш экспертиза идарәсе җитәкчесе Вадим Маркелов Әтнә районының Кубян урта белем бирү мәктәбенә 200 мең сум күләмендә ярдәм күрсәткән.