Республика матбугат һәм массакүләм коммуникацияләр агентлыгында Бөек Ватан сугышы ветераннарын котладылар

Бүген “Татмедиа” ААҖсы 18 ветеран журналист өчен чәй табыны әзерләде. Чара, Бөек Җиңү көне уңаеннан оештырылды. Ветераннарны котларга ТР Дәүләт Советы Рәисе урынбасары, ТР Журналистлар берлеге рәисе Римма Ратникова, “Татмедиа” ААҖ генераль директоры Фәрит Шәһиәхмәтов һшм аның киңәшчесе Равил Фәйзуллин килгән иде. 
“Хөрмәтле ветераннарыбыз! Майда бәйрәмнәр шактый. Бүген, мисал өчен, СССР вакытында без матбугат көнен бәйрәм итә идек. Алда безне тагы бик күп бәйрәмнәр көтә. Сезне шул бәйрәмнәр белән ихлас котлыйм! Сезгә сәламәтлек һәм якты көннәр телим!” - диде Римма Ратникова. 
“Бөек Ватан сугышы вакытында да, сугыш тәмамланганнан соң да фронт корреспондентлары, журналистлар Бөек Җиңүгә зур өлеш кертте. Дөрес, фронтта газета чыгарган журналистлар хакында бик сирәк искә алалар. Әмма алар − сугыш барган иң “кайнар” урыннарга беренче булып килеп кергән кешеләр. Бәйрәм белән сезне! Сәламәт булыгыз! Үзебезнең арада сезне күрүебезгә без бик шат. Алга таба да бергә булыйк!” - диде “Татмедиа” ААҖ генераль директоры Фәрит Шәһиәхмәтов ветераннарны котлап. 
Ветераннар исә үзләренең элеккеге каләмдәшләре, хезмәттәшләре белән аралашты, яшьлек елларын искә төшереп хәтер яңартты. “Татарстан” радиосында штаттан тыш хәбәрче булган, “Яшь ленинчы”, “Ялкын” журналларына үзенең мәкаләләрен бастырган Нияз Хакимуллин Җиңү көнен ничек каршы алуы турындда сөйләде. “Мин 15 яшьтән токарь булып эшләдем. Җиңү көнен дә Казанның авиция заводында каршы алдым. Безне төнге сәгать 3 тә бер залга җыйдылар да, бу шатлыклы хәбәрне җиткерделәр. Сугыш чорында безнең завод 11,5 мең самолет чыгарды. Бөек Ватан сугышы вакытында хезмәт куйган өчен мин 4 дәүләт бүләгенә ия булдым. Шуларның иң кадерлесе — “Хөрмәт билгесе” ордены”, - диде ул.
Ветераннар өчен чәй табыны, чәчәкләр, бүләкләр, Бөек Ватан сугышына багышланган видео-роликлар әзерләнгән иде. Шулай ук ветеран журналистлар Бөек Ватан сугышында һәлак булган каләмдәшләре – журналистлар һәм полиграфистлар истәлегенә “Татмедиа” бинасы каршында куелган һәйкәлгә чәчәкләр салды.