Россия 24 каналы Россия сәнәгате турында Татарстанда махсус репортажлар әзерли
Россия 24 хәбәрләр каналы «Россиядә җитештерелгән» дип исемләнгән махсус репортажлар сериясен башлап җибәрүе турында хәбәр итте. Әлеге проект кысаларында ил өчен кирәкле продукция җитештерүче предприятиеләрнең эше яктыртылачак. Проектны алып баручы Антон Борисов төшерү төркеме командасы белән бергә дүрт көн дәвамында Татарстанда булачак һәм Чаллыда, Алабуга махсус икътисади зонасында һәм Казанда урнашкан берничә төп предприятие эше белән танышачак.
Төшерү легендар КамАЗ заводыннан башланачак, анда алар иярле авыр йөк тракторлары һәм бортлы автомобильләр җитештерү процессы белән танышачак. Шулай ук игътибар үзәгендә IT-чишелешләр тәкъдим итүче KAMAZ Digital булачак. Аннары команда «Заряд» хоккей таяклары җитештерү заводына күчәчәк. Төшерүнең икенче көне автомобиль темасына багышланачак: анда люкс класслы автомобильләр җитештерә торган AURUS заводында булу, шулай ук «Бер пояс – бер юл» проекты буенча контейнер терминалы эше белән танышу планлаштырыла.
Команданың киләчәктәге планнары – Казандагы сыр җитештерү заводына һәм вертолет заводына бару. Шулай ук көнкүреш химиясе һәм косметика җитештерү буенча Россиядә иң эре NEFIS COSMETICS предприятиесе һәм литий-ион аккумуляторлар эшләү һәм җитештерү белән шөгыльләнүче НЭТЕР ГК заводы игътибар үзәгендә булачак. Репортажлар кысаларында җитештерүне үстерүгә, яңа технологияләр кертүгә, чит ил аналогларын алыштыруга, продукциягә ихтыяҗ үзгәрүгә, кадрлар мәсьәләләрен хәл итүгә, шулай ук товарлар җитештерү өчен бирелә торган дәүләт ярдәменә игътибар биреләчәк.