«Татмедиа» республика агентлыгы 2024 елга нәтиҗә ясый
"Татмедиа" республика матбугат һәм массакүләм коммуникацияләр агентлыгы Казан IT-паркында булачак киңәйтелгән утырышта бүген, 29 гыйнварда, 2024 елга нәтиҗә ясаячак һәм 2025 елга планнар билгеләячәк.
Утырыш башланганчы яңа медиа концепцияләре – республиканың әйдәп баручы ММЧ, нәшриятлар, иҗтимагый һәм мәгариф оешмаларыннан 16 экспонат тәкъдим ителәчәк күргәзмә ачылачак. Экспозициянең шактый өлеше Бөек Ватан сугышында Җиңүнең 80 еллыгына һәм Россия Федерациясендә һәм Татарстан Республикасында 2025 елда игълан ителгән Ватанны саклаучылар елына багышланган.
«Татмедиа» АҖ «Татарстан СВОда» экспозициясен күрсәтәчәк, биредә Татарстаннан булган Россия Геройларының портретлары һәм аларның батырлыгы турында хикәяләр, хәрбиләргә ярдәм чаралары турында белешмәләр урын алган.
Күргәзмәдә шулай ук республика ММЧның өстәмә чынбарлык, нейрочелтәр һәм ясалма интеллект куллануын күрсәтәчәкләр. Мәсәлән, "Татарстан - Яңа Гасыр" яңа виртуаль һәм өстәмә чынбарлык студиясен тәкъдим итәчәк, ул махсус җиһазлар ярдәмендә урта гасыр замокларыннан алып космоска кадәр теләсә нинди интерьерлар булдырырга мөмкинлек бирә. Бу технология реаль һәм компьютер сурәтләрен берләштерә. Студия Unreal Engine заманча технологияләре ярдәмендә эшләнгән, ул күпчелек заманча уеннарда кулланыла. ТНВ - мондый җиһазлары булган беренче төбәк студиясе.
"Татарстан Ньюс" шулай ук үзенең интервью өчен күчмә студиясе эшен күрсәтәчәк, ә "Интертат" исә татар журналистикасында нейрочелтәрләр һәм ясалма интеллект куллану идеясен күрсәтәчәк.
Күргәзмәдән соң киңәйтелгән утырыш башланачак. “Татмедиа” республика агентлыгы җитәкчесе Айдар Сәлимгәрәев төп доклад белән чыгыш ясаячак.