Россия мөхәррирләре һәм журналистлары Татарстандагы форумга җыелачак
28-30 августта Казанда илкүләм массакүләм мәгълүмат чараларының X юбилей форумы уза. Бу хакта оештыручылар хәбәр итә.
Быел чара Бәшир Рәмиев исемендәге IT-паркта уза. Ел саен форумда төбәк, өлкә һәм район басмалары, телерадиокомпанияләр һәм мәгълүмат агентлыклары җитәкчеләре катнаша. Чара кунакларын журналистлык осталыгы буенча семинарлар, экскурсияләр, илнең төрле төбәкләре зур басмалар катнашында пленар утырыш көтә.
Чарада Башкортстан, Киров, Түбән Новгород, Новосибирск, Оренбург, Самара, Ульяновск, Төмән, Ленинград, Свердловск, Чиләбе өлкәләреннән, Марий Эл, Мордовия, Пермь крае, Удмуртия, Чувашия, Төньяк Осетия – Алания, Ямало-Ненец автоном округы, Якутия, Луганск Халык Республикасы, Чечня, Чукотка автономияле округы массакүләм мәгълүмат чаралары һәм башка медиа вәкилләре дә катнашуларын раслады.
Элегрәк форум «Төбәк һәм илкүләм массакүләм мәгълүмат чаралары конгрессы» исеме белән уздырыла иде. Беренче тапкыр вакыйга 2005 елда булды һәм Россиянең 40 төбәгеннән һәм БДБ илләреннән 150 делегат җыйды. Аның нәтиҗәсе Дәүләт Думасына мөрәҗәгать булды - чыгарылган тәкъдимнәр алга таба массмедиа өлкәсен җайга сала торган законнарга үзгәрешләр керткәндә кулланылды. 2014 елда конгресс форумга үзгәртелде. Шул чордан башлап ул «Татарстан Республикасында дәүләт милли сәясәтен гамәлгә ашыру» дәүләт программасы кысаларында уздырыла.