Казанлылар Антон Богдановның «Иван Семёнов: Большой поход» фильмын беренчеләрдән булып карый алачак
27 сентябрьдә Казанда режиссер Антон Богдановның «Иван Семёнов: Большой поход» фильмының премьерасы узачак.
Фильмны төшергәндә туристик поход оештырылган, анда 40 төбәктән 4 меңгә якын кеше катнашкан. Бу поход рәсми рәвештә Россиянең рекордлар реестрында теркәлгән. Бу турыда матбугат конференциясендә ТР мәдәният министрының беренче урынбасары Юлия Әдһәмова белдерде.
«Без республика халкының «Иван Семёнов: Большой поход» фильмын карау мөмкинлеге булуга бик шат. Бу фильм гаилә, яхшылык һәм мәхәббәт турында» ,– диде спикер.
«Иван Семёнов: Большой поход» – хулиган һәм фантазер Иван Семенов турындагы популяр тарихның дәвамы. «Икенче өлештә без геройлар белән бергә «үсәбез». Бу өлеш теләкләр, үҗәтлек турында һәм иң мөһиме – маҗараларга бәйле», – дип бүлеште режиссер.
Богданов билгеләп үткәнчә, фильм ата-аналарга баланың балачагын тулысынча тоярга, эчке азатлык бирү кирәклеген аңларга ярдәм итәчәк.
Кинокартинаны Казанда Татарстан Республикасы Хөкүмәте ярдәмендә күрсәтәчәкләр. Казанлыларга картинаны федераль премьерага бер көн кала тәкъдим итәчәкләр.