«Татарстан» тышлыгында – Татарстан хатын-кызы»
«Татмедиа» бинасының беренче катында «Татарстан» тышлыгында – Татарстан хатын-кызы» күргәзмәсе бара. Ул 8 Март бәйрәменә багышлап оештырылган иде.
Һәр елның март аенда җитди «Татарстан» иҗтимагый-сәяси журналы, гадәттә, назлы һәм романтик журналга – хатын-кызлар басмасына әверелә. Бу үзгәреш тышлыктан ук башлана: аны республикабызның гүзәл затлары бизи.
«Татарстан»ның март номерында ир-атлар нәрсә турында сөйли? Әлбәттә, бары тик үзләренең яраткан хатын-кызлары: әниләре, хатыннары, әбиләре, апалары, кызлары, оныклары турында гына... Алар белән горурланулары, аларга сокланулары бәян ителә, алар адресына республикабызның баш журналында мәңгеләштерелгән, шуңа күрә бик кыйммәтле назлы сүзләр әйтелә.
«Нәшер ителүенең 101 нче елына «Татарстан»ның хатын-кызлар турында язылган номерлары тулы бер коллекцияне тәшкил итә. Сөйкемле һәм күркәм хатын-кызлар төшерелгән журнал тышлыкларын бүген бик теләп сезгә дә тәкъдим итәбез!» – диде «Татарстан» журналының баш мөхәррире Татьяна Вафина.