Әсгать Сәфәров журналистларга позитив яңалыклар да җиткерергә киңәш итте

"Татмедиа" Республика матбугат һәм массакүләм коммуникацияләр агентлыгында ТР җитәкчелеге вәкилләре ТР ММЧ җитәкчеләре һәм Россия ММЧның Татарстандагы махсус корреспондентлары белән очраштылар. 
ТР Президент Аппараты җитәкчесе Әсгать Сәфәров журналистларга һәлакәт, фаҗига, янгын, теракт турында гына язмаска киңәш итте. “Республикада тормышка ашырылган программалар, яңа җитештерү мәйданнары, галимнәрнең, табибларның, спортчыларның шәхси уңышлары хакында да язарга кирәк. Чынбарлыкны яшереп калыгыз димим, әмма позитив яңалыклар безгә аеруча җитми”, - диде ул. Чыгышын тәмамлап, җитәкче журналистларга югары рейтинглар һәм күп тиражлар теләде. ТР Дәүләт Советы Рәисе урынбасары, ТР журналистлар берлеге рәисе Римма Ратникова исә журналистларны берләшергә чакырды. Аның фикеренчә, берлекләргә берләшеп, журналистлар үзләренең хезмәт хокукларын гына түгел, Татарстан халкының мәгълүмат хокукларын да яклый алачак. 
Чарада берничә ММЧ корреспонденты ТР Дәүләт Советы Рәисенең һәм “Татмедиа” Республика матбугат һәм массакүләм коммуникацияләр агентлыгы җитәкчесенең Рәхмәт хаты белән бүләкләнде. 
Шулай ук, Әсгать Сәфәров “Татмедиа” ААҖнә 1906 елда чыккан “Казан мөхбире” татар басмасы һәм 1911 елда чыккан “Казанские известия” газетасының беренче экземплярларын истәлеккә тапшырды. 
“Татар-информ” МА мәгълүматлары буенча