Массакүләм мәгълүмат чараларында Россия суд приставлары хезмәте эшчәнлеген яктыртуга конкурс игълан ителгән

Суд приставлары федераль хезмәте эшчәнлеген 2014 нче елда массакүләм мәгълүмат чараларында яктырту буенча бөтенроссия конкурсының беренче этабы старт алды, дип хәбәр итә федераль хезмәтнең ТР буенча идарәсе матбугат хезмәте. 
Бәйгедә федераль, төбәк һәм район ММЧларында дөнья күргән басма материал, фоторепортаж, радио-һәм телематериал авторлары катнаша ала. 
Конкурс ике этапта узачак: “Иң яхшы телесюжет”, “Иң яхшы радиосюжет”, “Матбугатта иң яхшы тематик рубрика”, “Интернет-ММЧда иң яхшы тематик рубрика”, “Матбугатта иң яхшы материал”, “Интернет-ММЧда иң яхшы материал”, “Иң яхшы телефильм” һәм “Россия суд приставлары эшчәнлеген яктыртуда керткән өлеш өчен” номинацияләре буенча федераль һәм төбәк этапларында үтәчәк. 
Конкурста катнашу өчен заявкалар 2014 нче елның гыйнвар башыннан 25 нче июненә кадәр кабул ителә. Заявканы ирекле төстә рәсмиләштерергә мөмкин, анда исем-фамилия, эш урыны һәм вазифа, конкурс эше, номинация исеме, электрон почта адресы һәм телефон күрсәтелергә тиеш. Шушы заявкага конкурска тапшырыла торган эшләрне теркәп бирергә кирәк. Матбугатта булган язманың оригиналы тәкъдим ителергә тиеш. “Россия суд приставлары эшчәнлеген яктыртуда керткән өлеш өчен” номинациясендә катнашучылар конкурска төрле елларда дөнья күргән өчтән дә ким булмаган материал тапшырырга тиеш. 
Конкурска йомгак 2014 нче елның ноябрендә – Суд приставы көнен бәйрәм иткәндә ясалачак. 
Конкурс турында тулырак мәгълүмат алу өчен Суд приставлары федераль хезмәте ТР буенча идарәсенең ММЧ белән элемтәдә тору бүлегенә мөрәҗәгать итәргә була.