Татарстанда басма ММЧларын медиаүзәкләр челтәре аша тарату проекты эшләнелгән

Ул хупланган очракта, аны башта Казанда, аннары республикада тормышка ашыру күздә тотыла 
Республикада вакытлы матбугат белән тәэминат “куелыгы” 1 мең кешегә 435 данә тәшкил итә. Татарстан, элеккечә, иң күп укый торган төбәкләр исемлегендә кала бирә. Югары үсеш алган шәһәр һәм төбәк критерийларының берсе булып, басма продукциянең киң таралышы санала. Бу нисбәттән, Россиянең әйдәп баручы төбәкләре тәҗрибәсе өйрәнелгән һәм медиаүзәкләр ярдәмендә берәмле басма продукцияне тарату проекты эшләнгән. Бу хакта бүген “Татмедиа” Республика матбугат һәм гаммәви коммуникацияләр агентлыгының йомгаклау коллегиясе утырышында ведомство җитәкчесе Ирек Миңнәхмәтов хәбәр итте. 
Коллегия утырышында Татарстан Президенты Рөстәм Миңнеханов, ТР Президент Аппараты җитәкчесе Әсгать Сәфәров, ТР Премьер-министры урынбасары Юрий Камалтынов, ТР Дәүләт Советы Рәисе урынбасары, ТР Журналистлар берлеге рәисе Римма Ратникова катнашты. 
Медиаүзәкләрнең асылын түбәндәгеләр тәшкил итәчәк: бушлай WI-FI; торак-коммуналь хезмәтләр өчен, штрафларны түләү; газета, журнал, китап һәм башка басма продукция сату; әбунә буенча электрон хезмәтләр һәм башкалар.
 “Берәмле басма продукцияне медиаүзәкләр челтәре аша тарату проекты буенча кыска вакыт эчендә җентекле эш планын тәкъдим итәргә, һәм бу проектны Казанда, аннан соң республикада тормышка ашыру бәясен билгеләргә әзербез. Моның инвестицион проект булуын да билгеләп узарга кирәк, шуңа бәйле рәвештә, ул финанс ярдәме таләп итми”, - дип белдерде Ирек Миңнәхмәтов. 
Рәсми мәгълүматларга караганда, республикада 381 газета, 170 журнал теркәлгән. Аларның 156 сы – татар телендәге газета-журналлар, чуаш телендә – 5, удмурт телендә – 1, керәшеннәр өчен 1 газета чыгып килә. Әбунә исә, басмага ихтыяҗ күплеген күрсәтүче мөһим фактор булып кала. “Татарстан почтасы” оешмасы мәгълүматларына караганда, 2014 нче елның беренче яртыеллыгына язылу түбәндәгечә: федераль басмаларга – 326 мең данә; республика басмаларына – 1 млн 67 мең данә; район басмаларына – 270 мең данә.