Республика җитәкчелеге вәкилләре журналистларны һөнәри бәйрәмнәре белән котладылар

Бүген “Татмедиа” Республика матбугат һәм массакүләм коммуникацияләр агентлыгында республика җитәкчелеге вәкилләре ТРның ММЧ җитәкчеләре һәм Россия ММЧларының Татарстандагы махсус корреспондентлары белән очрашты. 

Россия матбугаты көне уңаеннан уздырылган бу чарада ТР Дәүләт Советы Рәисе Фәрит Мөхәммәтшин, ТР Президент Аппараты җитәкчесе Әсгать Сәфәров, ТР Дәүләт Советы Рәисе урынбасары, ТР журналистлар берлеге рәисе Римма Ратникова һәм “Татмедиа” Республика матбугат һәм массакуләм коммуникацияләр агентлыгы җитәкчесе Ирек Миңнәхмәтов катнашты. 

Чара Фәрит Мөхәммәтшинның чыгышы белән башланып китте. Ул журналистларны һөнәри бәйрәмнәре белән котлады һәм аларның эшчәнлегендәге кайбер мәсьәләләрне күтәреп чыкты. Рәис, көндәшлек шартларында тиражны яки рейтингны саклап калу өчен, ММЧ белән идарә итүче кадрларга шактый тырышлык куярга һәм аерым осталык белән эш итәргә кирәк булуын ассызыклады. Шулай ук, журналистлар өстендә дә шактый зур җаваплылык ятуын белдерде. “Ниндидер сәяси киеренкелек тумасын, конфессияара һәм милләтара ызгышларга нигез бирмәс өчен, тормышыбызда күзәтелгән аерым бер фактларны һәм сирәк очраучы тискәре якларны тасвирлау, яктырту белән мавыгып китмәсәгез иде”, - дип белдерде ул. 

ТР Дәүләт Советы Рәисе чыгышын спорт темасын яктырту мәсьәләләре белән дәвам итте. Аның сүзләренчә, спорт вакыйгаларын профессиональ дәрәҗәдә яктыртырдай журналистлар җитеп бетми. 

Ф. Мөхәммәтшин ММЧ җитәкчеләренә Татарстан спорт журналистлары берлеге әгъзаларының мөрәҗәгатен дә җиткерде. Әлеге мөрәҗәгатьтә республика һәм муниципаль ММЧларында спорт һәм сәламәт тормыш рәвеше алып баруны яктыртачак рубрикалар булдырырга кирәклеге искәртелә. 

Рәис спорт темасына күбрәк язган, сөйләгән саен, республика халкының сәламәтлегенә һәм гомер озынлыгына тәэсир итеп булуын да әйтеп үтте: “Хәзерге вакытта Татарстанда уртача гомер озынлыгы - 72,5 яшь. Без Универсиадага 5 ел әзерләндек. Әлеге вакыт эчендә спорт һәм сәламәт тормыш рәвеше алып бару турында шактый материаллар дөнья күрде. Мөгаен, бу күрсәткеч шушыңа бәйледер”, - диде ул. 

Фәрит Мөхәммәтшин, 2014 елда журналистлар алдында торган иң мөһим бурычларның берсе дип, сайлау кампанияләре турында яктыртуны атады. Хәзерге көндә 63 сәяси партия бар. Рәис фикеренчә, алар артында кемнәр торуын һәм аларның нинди максат белән эш итәргә җыенуын халыкка җентекле һәм аңлаешлы рәвештә төшендерергә кирәк. “Боларны үзлектән аңлау җиңел түгел. Яхшылап аңлатырга кирәк булачак. Әгәр партияләрнең нәрсә теләүләрен күрсәтеп бирә алмаса, халык ММЧларга үпкәләячәк”, - диде Ф. Мөхәммәтшин. 

Чыгышын йомгаклап, ТР Дәүләт Советы Рәисе, журналистлар икътисад, сәясәт, авыл хуҗалыгы, спорт һ.б. темаларга махсуслашуырга тиеш, дип белдерде. “Бер кеше бөтен темага да җентекле һәм тирәнтен яза алмый бит инде”, - диде ул фикерен дәлилләп.