Марат Әхмәтов «Татмедиа»да: Бу тармак белән танышу бик күп мәгълүмат бирде
Бүген Татарстан Республикасы Дәүләт Советы Рәисе урынбасары Марат Әхмәтов «Татмедиа»га килде. «Бу тармак белән танышу бик күп мәгълүмат бирде», — дип белдерде ул «Татар-информ» хәбәрчесенә.
Марат Әхмәтов «Идел-Пресс» полиграфия-нәшрият комплексында булды, «Татар-информ» агентлыгы эше белән якыннанрак танышты, тагын берничә редакциягә керде.
«Идел-Пресс» полиграфия-нәшрият комплексында ул эштә нинди проблемалар булуын сорашты, җиһазларның төзеклеге белән танышты, күпме газета чыгуы белән кызыксынды.
«Идел-Пресс» полиграфия комплексының генераль директоры Әнәс Әскәров былтыр 66 млн га якын газета, быел 20 декабрьгә 46 млн газета чыкканын әйтте. Уфа газеталары да биредә җыелуын әйттеләр. «Газета җитештерү кими. Бөтен республикага 200 төрле исемле газета чыга. Пандемиядән соң конкуренцияне күтәрә алмаганнар ябылды», — дип белдерде.
Алга таба Марат Әхмәтов «Татмедиа»ның яңа ашханәсен карап чыкты. «Татмедиа» АҖ генераль директоры Шамил Садыйков хезмәткәрләр 100 сум һәм аннан артыграк бәягә ашаган очракта, 40 сумы кире кайтарылуы турында әйтте.
«Татар-информ» агентлыгы эше белән якыннан танышып, ул татар телендәге сайтның, шулай ук «Интертат» электрон газетасының уникаль кулланучылары турында мәгълүматны белде.
Марат Әхмәтов беренче катта әле күптән түгел генә ачылган әдәби кафе эшчәнлеген дә хуплады һәм бу тәҗрибәне башка урыннарда да тарату кирәклеген әйтте.
«Минем өчен бу тармакның тормышын күрү кирәк иде, чөнки тел темасы белән шөгыльләнә башлагач, медиа структуралардан, аларның җитәкчелегеннән башка бер генә адым да алга китеп булмаячак. Халык белән элемтә алар аша бара. Бу тармакны белү, типография, редакцияләр, иҗат коллективлары, „Татар-информ“, „Татмедиа“ акционерлык җәмгыяте эше белән танышу да бик күп мәгълүмат бирде», — дип йомгак ясады Марат Әхмәтов.
Ул киләчәктә күбрәк уртак, кызыклырак проектлар табу мөһимлеген белдерде.
«Редакция коллективларындагы хезмәткәрләрне үстереп, кызыксындырып, иҗади эшчәнлеккә күбрәк тартып, халык күңеленә тизрәк үтеп керердәй, милләтнең күңелен кузгатырдай проектлар эзләячәкбез. Бик канәгать бүгенге очрашудан. Балалар белән очрашудан да канәгать калдым. Татар теленә, милләт язмышына битараф булмаган алмаш бар икән бездә», — диде.
«Иҗат коллективлары янып тора, берсеннән-берсе кызыклырак яңа проектлар, тәкъдимнәр игълан итәргә әзер булып торалар. Киләчәгебез өметле. Киләсе елда уңышларга ирешеп эшләрбез дип уйлыйм. Бәлки, уртак эшебезнең матур нәтиҗәләрен дә күрә башларбыз», — дип бәя бирде Марат Әхмәтов.