ТНВ – җиңүче!
«7 дней» мәгълүмат-аналитика каналында дөнья күргән «Женский бизнес – мужский взгляд» репортажын телеакадемиклар югары бәяләде.
«ТЭФИ-Капитал» гомумроссия конкурсында җиңүчеләрне бүләкләү тантанасы Уфа шәһәрендә узды. Быел бу бәйгедә ике йөзгә якын журналист эше катнашты.
ТНВ каналының җиңгән репортажына бүләкне Оксана Пушкина тапшырды. Бу номинациядә телеканал, Новгород һәм Архангельск шәһәрләреннән җибәрелгән эшләрне узып, җиңү яулады.
«Мин – иң алдынгы республикаларның берсе булган Татарстан вәкиле. Бу бүләкне ияләренә бик рәхәтләнеп тапшырачакмын», – диде бүләкне чыгып алганда «Яңа гасыр» ТРК акционер җәмгыятенең Уфадагы корпункты директоры Миләүшә Латыйпова.
Җиңгән репортажның авторы Тимур Бикмурзин тантанада катнаша алмады. Ул «7 дней» тапшыруы барлыкка килгән көннәрдән бирле эшли. Икътисад һәм бизнес өлкәсен биш бармагы кебек белә торган журналистның бу эше республикадагы хатын-кыз бизнесменнар эшчәнлеге аша бизнесвуменнарның эштә генә түгел, гаиләдә дә бәхетле була алуын күрсәтүгә багышланган.
«Бу – "7 дней" программасының гадәти бер сюжеты, җиңү минем генә түгел, программабызның бөтен командасының – монтажлаучыларның, операторларның да казанышы», – дип белдерде Тимур Бикмурзин үзе.
«7 дней» программасы быел 15 яшьлеген билгеләп үтте, әлеге җиңү проектның федераль дәрәҗәдә танылуын тагын бер кат раслады.
«Бу – коллегеларыбыз, аерым алганда, «7 дней» программасын эшләүчеләр хезмәтен лаеклы бәяләү. Әлеге программа республикадагы бердәнбер аналитик программа. Көн кадагына суга торган җитди сюжетлары белән сөендергән проектның шулай югары бәяләнүенә мин бик шат. Тимур бу бүләккә бик лаек», – дип белдерде «Яңа гасыр» телерадиокомпаниясе җитәкчесе Илшат Әминов.