Экстремизмга каршы тематикасын иң яхшы яктыртуга багышланган конкурста җиңүчеләрне бүләкләделәр
Конкурска 312 гариза бирелгән иде.
"Тема бик гади түгел. Күргәнебезчә, ул үзенең актуальлеген югалтмый. Бу – Татарстан яки Россия гына түгел, бөтен дөнья проблемасы. Әлеге теманы җәмгыятьтә күтәрергә теләгән көчләр күп. Безнең бурычыбыз –бөтен кешегә бу афәт турында җиткерү", – дип билгеләп үтте “Татмедиа” республика матбугат һәм массакүләм коммуникацияләр агентлыгы җитәкчесе Айдар Сәлимгәрәев.
Ул ассызыклаганча, 2020 елда конкурска гаризалар, алдагы ел белән чагыштырганда, күбрәк бирелгән. Конкурс дүрт номинация буенча үткәрелде: «ММЧда иң яхшы мәкалә», «Экстремистлык тематикасына иң яхшы телесюжет һәм радиосюжет» һәм «Яшьләрне интернет аша деструктив берләшмәләргә җәлеп итүне профилактикалау буенча ММЧда иң яхшы материал».
"Экстремизм һәм терроризм темасы – үзе зур проблема, ә аның турында бөтен кешегә үтеп керерлек итеп сөйләү тагын да зуррак мәсьәлә. Биредә осталык һәм бармак очлары белән тою таләп ителә», - диде ТР Террорга каршы комиссия аппараты җитәкчесе Илдар Галиев.
Конкурсның приз фонды 455 мең сум тәшкил итте. "Массакүләм мәгълүмат чараларында иң яхшы мәкаләт" номинациясендә ТР Мөслим районыннан «Сельские огни» газетасы өченче урынны алды, икенче урында — «Ватаным Татарстан» газетасы. Беренче дәрәҗә дипломны «Бугульминская газета»га тапшырылды.
"Экстремистлык тематикасына иң яхшы телесюжет һәм радиосюжет" номинациясендә өченче урынны «Актаныш-информ» вәкиле алды, икенче дәрәҗә дипломны «Апас хәбәрләре» телекомпаниясенә тапшырылды, ә беренче урынны ТНВ хәбәрчесе яулады.
Аннары Яшьләрне интернет аша деструктив берләшмәләргә җәлеп итүне профилактикалау буенча ММЧда иң яхшы материал» номинациясендә җиңүчеләрне бүләкләделәр. Өченче урында — Мамадыш «Нократ» мәгълүмат сайты, икенче урында – «Идел» журналы хәбәрчесе, ә беренче дәрәҗә дипломны «ВГТРК Татарстан» журналисты алды.
«Барлык эшләр дә лаеклы һәм төрле планлы булды. Журналист бу темага алына икән, материалы төгәл һәм җәмгыятьтә киеренке хәлләр килеп чыгуга юл куймый торган булырга тиеш», — дип нәтиҗә ясады Татарстан Эчке эшләр министрлыгының Матбугат хезмәте бүлеге башлыгы Ирина Нижельская.
Призлы урыннар бирү мәсьәләсендә бәхәсләр күп булды. Аерым алганда, бу республиканың һәр муниципалитетында экстремизмга каршы эшнең үзенчәлеге белән бәйле.
«Район журналистикасының үз спецификасы бар. Белүебезчә, экстремизм эре шәһәрләрдә түгел, ә кечкенә бистәләрдә һәм авылларда үсә. Шуңа күрә җирле аудитория белән элемтәне саклау мөһим", — дип тәмамлады сүзен Нижельская.
Ул конкурс эшләренең югары дәрәҗәдә булуын билгеләп үтте һәм алар федераль дәрәҗәдәге материаллар белән ярыша алалар дип белдерде.